Nga Boldnews.al
Vetëm 13% e qytetarëve mendojnë se Arta Marku duhet të vijojë të jetë në krye të Prokurorisë së Përgjithshme. Ndërkohë që një shumicë absolute prej 87% e publikut janë pro kandidaturës së Olsian Çelës për të drejtuar institucionin e Akuzës në 7 vitet e ardhshme.
Këto janë rezultatet e një sondazhi të zhvilluar nga “Boldnews.al” gjatë 4 ditëve të fundit, ku morën pjesë mbi 3000 lexues.
Redaksia e “Boldnews.al” hapi sondazhin menjëherë pasi Këshilli i Lartë i Prokurorisë i dërgoi Parlamentit për votim listën me 3 kandidatë, ku Olsian Çela është renditur i pari e pas tij Arta Marku dhe Fatjona Memçaj.
Pyetja që iu shtruan lexuesve ishte: “Cilin do të mbështesni për Prokuror të Përgjithshëm: Arta Markun apo Olsian Çelën”?
“BN” u nxit të realizonte sondazhin, jo vetëm nga interesi i lartë publik për emrin e Kryeprokurorit të ri, por edhe për të testuar vërtetësinë e një ankete që Arta Marku dorëzoi zyrtarisht pranë Këshillit të Lartë të Prokurorisë, në të cilin ajo rezultonte e para, ndërsa rivali i saj kryesor, Çela, i fundit.
Rezultati i sondazhit të “BN” është kryekëput i ndryshëm nga ai që dorëzoi Arta Marku para anëtarëve të Këshillit të Lartë të Prokurorisë, të cilit nuk i dihet origjina.
Për më tepër, për disa arsye shumë thelbësore, sondazhi i “BN” është shumë më i saktë se sa ai që pretendon Kryeprokurorja e Përkohshme.
Redaksia e “Boldnews.al” ka qenë neutral në garën për Prokuror të Përgjithshëm dhe nuk ka mbështetur asnjë prej kandidatëve. Madje, “Boldnews.al” është ndër të paktat redaksi që ka publikuar artikuj kritik për të dy garuesit kryesorë për postin e Kryeprokurorit me mandat të plotë.
Po ashtu, sondazhi përfshin ditët, në të cilat, publiku u “bombarduan” nga media të ndryshme me aludimin se Olsian Çela ishte nipi i ish-Prokurorit të Përgjithshëm famëkeq të komunizmit, Aranit Çela.
Ky informacion rezultoi i pavërtetë dhe që, sipas “Rilindjes Demokratike” u shpërnda nga Ulsi Manja për të mbështetur Arta Markun.
Por, pavarësisht sqarimit të situatës, gjatë ditëve të sondazhit të zhvilluar nga “BN”, Olsian Çela dihej ende si nipi i Aranit Çelës dhe kjo mund ta penalizonte atë në sytë e opinionit publik.
Por, edhe ky aludim nuk duket se ka ndryshuar qasjen e qytetarëve, të cilët zgjodhën në shumicë të mbështesnin Olsian Çelën para Arta Markut.
Trendi i sondazhit të zhvilluar nga redaksia e “BN” u pa që në momentet e para të publikimit të tij, mbrëmjen e datës 14 nëntor 2019.
Disa dhjetra lexues, të cilët iu bashkuan menjëherë anketës, dhanë votën e tyre pro emrit të Çelës. Në një moment të dytë, emri i Arta Markut pati një trend rritës, por që gjithësesi arriti deri në 13%. Kjo shifër qëndroi e pandryshueshme deri në përfundim të sondazhit.
Në përfundim, pyetjes së redaksisë se “cilin do të votonit për Prokuror të Përgjithshëm;Arta Markun apo Olsian Çelën”, 13 % e publikuar votuan në favor të Kryeprokurores së Përkohshme, ndërkohë që 87% në favor të Olsian Çelës.
