Ferrari vjen në Brazil pas një periudhe aspak të lehtë, me akuzat e Verstappen dhe Hamilton se kanë përdorur një motor të parregullt në Austin. Por përgjigja e Sebastian Vettel ka qenë e menjëhershme.
“Gjithkush është i lirë të thotë atë që mendon, por ne kemi një përshtypje tjetër. Në 5 vitet e fundit, Mercedes ka patur një motor më të fortë. Nëse tani vlerat kanë kaluar në favorin tonë, shpresoj që këto të vazhdojnë për 5 vitet e ardhshme”.
“Nuk ka shumë gjëra për t’u thënë. Mendoj se ai koment ishte i papjekur. E injoroj sepse është i parëndësishëm. Duam t’i përgjigjemi në cirkuit. Hamilton ka përjetuar një sezon të jashtëzakonshëm. Ishte e qartë se do të fitonte botërorin. Nuk e mendoja se do të fliste ashtu” – ka shtuar Vettel.
Për shkak të zëvendësimit të motorrit, te makina e Charles Leclerc, kjo fundjavë pritet të ketë probleme. Por piloti nga Monako nuk shqetësohet shumë për komentet. “Për ne do të jetë një fundjavë normale, do të përqendrohemi si gjithnjë në punën tonë. E dimë mirë se çfarë do të bëjmë dhe nuk ka asnjë lloj problemi. Nuk kemi aspak presion sepse nuk kemi bërë asgjë më shumë se sa punën tonë të përhershme. Jemi të vetëdijshëm për atë që bëjmë dhe jemi të kënaqur kështu” – ka thënë Leclerc.
