Kombëtarja shqiptare nisi sot seancat stërvitore për tu përgatitur për ndeshjen e fundit eliminatore ndaj Francës, në Tiranë ditën e diel.
Trajneri Edi Reja e ndau grupin në dy pjesë, me lojtarët titullarë ndaj Andorrës, që zhvilluan fizioterapi dhe ushtrime në pishinë për të rikuperuar sa më shpejt formën e tyre fizike, pas ngarkesës që patën në ndeshjen e “Elbasan Arena”.
Ndërkohë pjesa tjetër e lojtarëve që nuk u aktivizuan në barazimin e fundit ishin të pranishëm në fushë nën urdhrat e trajnerit Edy Reja.
Seanca si zakonisht nisi me një përgatitje të lehtë fizike për t’i lënë më pas radhën ushtrimeve të ndryshme me top. E premtja do të jetë dita e fundit që kuqezinjtë do të stërviten në resortin Tropikal për këto eliminatore, ndërsa këtë të shtunë do të stërviten në Tiranë ku do të prekin dhe për herë të parë fushën e re të stadiumit të ri të kuqezinjve.
