Tenisti zviceran Roger Federer fitoi 2-0 (6-4, 6-3) ndaj Novak Djokovic, në ndeshjen e fundit të grupit Bjorn Borg, të vlefshme për finalet e ATP Championship.
Kjo ishte ndeshja e parë që dy tenistët luanin që pas finales së Wimbledon, ku fitoi Djokovic. Këtë herë, Federer bëri një ndeshje të përkryer, duke e dominuar lojën në të dyja setet.
Ky sukses kualifikon tenistin zviceran në gjysmëfinalet e këtij turneu. Në takimin tjetër të këtij grupi, italiani Matteo Berrettini mundi 2-0 (7-6, 6-3) austriakun Dominic Thiem.
Sot luhen ndeshjet e treta edhe në grupin Andre Agassi. I kualifikuar në gjysmëfinale është greku Stefanos Tsitsipas, që sot do të përballet me Rafael Nadal, të cilit i duhet fitorja.
