Kryetari i KLP-së, Gent Ibrahimi, tha sot për mediat se shpresonte që Kuvendi të ndiqte të njëjtën logjikë për zgjedhjen e Kryeprokurorit të ri.
Afati që ka Kuvendi për të zgjedhur Prokurorin e ri të Përgjithshëm është 30 ditë nga data e sotme, ndërsa KLP në pikëzimin që i bëri kandidatëve renditi të parin Olsian Çelën, të dytën Arta Markun dhe të tretën Fatjona Memçajn.
“Procesi i vlerësimit ka qenë profesional dhe aritmetikor. Në këto kushte ligji parashikon që brenda tre ditësh nga dita e sotme kandidatët kanë afat për të bërë ankimimin”, tha Ibrahimi.
Në vijim ai shtoi se nuk sheh ndonjë arsye për mëdyshje nga Kuvendi për zgjedhjen e Kryeprokurorit të ri.
“Janë kandidatë të vlefshëm që të tre, por është Kuvendi që do të vendosë. Ne do të bashkëpunojmë me secilin, vlerësojmë se Kuvendi do të ndjekë llogjikën tonë.
Jemi ne që i vlerësojmë nga ana profesionale, por i takon Kuvendit të zgjedhë”, tha Ibrahimi.
