PËRDITËSUAR/ Pas disa orësh në kampin Al Hawl, grupi i xhirimit i A2 ka arritur të sigurojë disa dëshmi nga brenda tij. Gazetari Julian Kasapi dhe operatori Indrit Myftari pasi kanë kontaktuar me redaksinë thanë se në kamp kanë arritur të marrin dëshmitë e disa grave dhe fëmijëve shqiptarë që qëndronin në kamp, raporton televizioni A2.
***
Gazetarët shqiptarë hyjnë në kampin ku mbahej Alvin, humbin kontaktet
Grupi i xhirimit të A2 arriti të hyjë në kampin Al Hawl në Siri. Gazetari Julian Kasapi së bashku më operatorin Endrit Myftari arritën të futen në kampin famëkeq, pasi u kryen të gjitha kontrollet e sigurisë, por, që prej atij momenti nuk kemi më asnjë kontakt me ta, raportoi A2 .
Në këtë kamp gjenden mbi 75 mijë persona, familjarë të luftëtarëve të ISIS dhe konsiderohet nga vëzhguesit ndërkombëtarë si një inkubator për brezin e ardhshëm të ekstremistëve. Mes tyre janë edhe rreth 80 shqiptarë, bashkë me fëmijët e tyre, që ashtu si 11-vjeçari Alvin Berisha, presin për t’u shpëtuar.
“Për pak minuta futemi në kampin Al Hawl. Sipas stafit të sigurisë duhet të jemi mjaft të kujdesshëm, pasi në aneksin e të huajve ku ne pritet të futemi kanë ndodhur mjaft trazira, pasi konsiderohet edhe si pjesa më e radikalizuar të kampit. Vetëm javën e shkuar kanë ndodhur të paktën 10 vrasje, sipas stafit të sigurisë së kampit, ndërkohë që disa persona të tjerë janë rrëmbyer. Në këtë aneks jetojnë mbi 10 mijë persona, ndërkohë që ne do të mundohemi, pasi nuk kemi shumë kohë në dispozicion për të gjetur shqiptarët”, tha në një komunikim telefonik gazetari Julian Kasapi.
