Florian Kamberi është prurja më e re e Kombëtares Shqiptare.
Sulmuesi i Hibernian, aktualisht ndodhet në Durrës, duke u stërvitur, i entuziazmuar nga perspektiva për të debutuar me kuqezinjtë.
Kamberi, 24 vjeç, mund të kishte luajtur për Zvicrën, atje ku ka lindur, ose Kosovën dhe Shqipërinë, dy kombëtaret të gjakut të tij, nga ku janë prindërit e tij.
Në fund të fundit, ishte Shqipëria që shfaqi dëshirën më të madhe për ta marrë, e thirri javën e kaluar për dy kualifikueset e fundit të “Euro 2020”, ndaj Andorrës dhe Francës.
“Kam pasur kontakte me Shqipërinë, Kosovën dhe Zvicrën, por kuqezinjtë janë treguar më të interesuar dhe e kam pasur të lehtë që të zgjedh ata”.
Ndërsa i pyetur se si e pret debutimin e tij, ai përgjigjet:
“Do të jetë një gjë shumë e madhe, nëse luaj në këto dy ndeshje, shpresoj të përfshihem në formacion dhe të krijoj përshtypje pozitive te stafi teknik në stërvitje.” tha ai për “Evening News”, në Skoci.
“Çdo ndeshje me ekipin tënd kombëtar është një privilegj, pavarësisht se kë ke kundër. Sidoqoftë, nëse e luaj ndeshjen time të parë, ose të dytë kundër një skuadre si Franca, kampiones së botës, e bën edhe më mbresëlënës këtë moment në karrierën time”.
