Sipas Institutit të Gjeoshkencave, sot pasdite (e hënë, dt.11) dhe nesër (e martë, dt.12) priten reshje intensive në qarqet Berat, Korçë, Vlorë dhe Gjirokastër por lokalisht shumë intensive në Vlorë dhe Gjirokastër. Reshjet do të shoqërohen me shtrëngata në këto qarqe. Ndërsa në qarqet Shkodër, Kukës, Durrës, Tiranë dhe Fier priten reshje mesatare por lokalisht intensive në Shkodër, Kukës dhe Fier (siç tregohet në tabelë, respektivisht për secilin qark).
Për shkak të intensitetit të lartë të reshjeve në jug dhe lindje të territorit, në qarqet Berat, Korçë, Vlorë dhe Gjirokastër ka mundësi për përmbytje të vogla lokale kryesisht në fundin e ditës së nesërme e martë dt.12 dhe pjesën e parë të ditës së mërkurë dt.13. Në zonat urbane, problemet mund të shfaqen në varësi të gjendjes së sistemit të kanalizimeve. Lumenjtë jugorë Semani dhe Vjosa do të kenë tendencë për rritje të prurjeve përgjatë ditës së mërkurë por nuk parashikohen dalje nga shtrati.
Ttemperaturat minimale dhe maksimale të ajrit pritet të arrijnë:
në bregdet: 15 / 20 °C
në vendet e ulëta: 14 / 21 °C
në vendet malore: 8 / 14 °C
Era pritet të fryjë mesatare deri shumë e fortë në jugperëndim të vendit.