Shpëtimi i Alvinit dhe operacioni “bolla e zezë” në Shqipëri

 

Nga Boldnews.al

Sot është dita e parë e 11-vjeçarit Alvin Berisha në liri, pranë babait dhe dy motrave. I iku tmerrit të ISIS, i mbijetoi bombardimeve, plumbave, histerizmit njerëzor të paprecedent, qëndroi një vit në kampin famëkeq i vetëm dhe drama e tij pati një fund kur autoritetet italiane, forcat speciale të karabinerisë me mbështetjen e organizmave humanitare dhe lojës së fortë diplomatike Itali-Liban, mundën që të shpëtonin një të mitur nga ferri.

Kjo u qartësua dje deri në mesditë, pasi nga paraditja shumëkush mendoi se shpëtimi i Alvinit erdhi nga gjeneral Sandër Lleshaj. Me syze të errëta, veshur me pantallona xhins dhe ndoshta ndonjë “armë të fshehur”, ai mësyu brenda kampit. Gjenerali ynë e shpëtoi Alvinin e mbajti në krahë, i veshi flamurin kuqezi shkrehu disa foto si dëshmi dhe në fund dha mesazhin për qendrën: “Operacioni ‘shpëtimi’ përfundoi me sukses-të kalohet në planin “B”, me operacionin “bolla e zezë” nën drejtimin e kryeministrit dhe Fug(k)save të tij….

Mjeshtër Rama mori një foto të Lleshaj me Alvinin dhe e shpërtheu rrjetin duke shkruar se: “Pas një jave në kufirin sirian, së bashku me një skuadër speciale të policisë sonë dhe në bashkëpunim të ngushtë me partnerët italianë, ministri ynë i brendshëm po përcjell në këtë moment Alvinin në ambasadën italiane në Bejrut, prej ku vogëlushi shqiptar do të pajiset me dokumentet e nevojshme e do të fluturojë drejt babait në Romë”.

Shpejt doli se Lleshaj qëndronte i qetë në një hotel në Liban, në pritje të përfundimit të aksionit mjaft të rrezikshëm të ndërmarrë nga forcat speciale të karabinerisë italiane, shërbimit sekret dhe efektivëve të Libanit të cilët nxorrën Alvin Berishën nga kampi “Al Hol” në Siri dhe e dërguan shëndoshë e mirë në zonën e sigurt.

Por Alvini ende ishte në “rrezik”, jo më nga ISIS, por nga një tjetër “organizatë” si qeveria shqiptare, e cila është e pajisur deri në dhëmbë me “armë” moderne si: Aparatë fotografik, kamera, dronë filmues, skenografi me simbole kombëtare, aktorë dhe rrjete sociale që përçojnë propagandën.

LEXO EDHE  Reshje shiu dhe ulje temperaturash, mësoni parashikimin e motit për sot

Vogëlushi 11-vjeçar ishte vërtetë në liri, por nga pamjet e servirura nga zyra e propagandës qeveritare, ai shfaqet më së paku i ndrojtur para disa pozave të detyruara ku pas shpine i vendosin një flamur të Shqipërisë dhe detyrohet të qëndrojë për pak minuta si i “marrë peng” për foto dhe filmime pranë ministrit të Brendshëm Sandër Lleshaj dhe një drejtuesi të Antiterrorit shqiptar, i cili edhe ai humbi për një çast profesionalizmin për shkak të propagandës që kërkon qeveria jonë, duke u afishuar me fytyrë.

I ndodhur ngushtë nën kritika mjaft të forta, se ky mashtrim u doli shpejt, ministri Lleshaj dha një tjetër mesazh, tashmë jo të koduar, jo me syze të errata, por nën “uniformën” e Rilindjes. “Rasti ka marrë një vëmendje të madhe dhe natyrisht lind pyetja nëse po përdoret politikisht? Dhe unë them po. Po e përdorim politikisht për të dhënë disa mesazhe të rëndësishme që duhet të vlejnë si eksperiencë pas këtij operacioni. Alvin Berisha është një nga ato rastet që duhet të na tregojë se terrorizmi, ekstremizmi nuk duhet të ketë vend në shoqëritë tona”, deklaroi Lleshaj.

Sot asgjë nuk ka ndryshuar pasi nuk është hera e parë, nuk do të jetë as e fundit që propaganda dështon për momentin, por e rimerr veten, po me propagandë. Do të shfaqet diçka tjetër surreale, do bombardohet një popull i tërë me imazhe, deklarime dhe fshehje të së vërtetës. Operacioni “bolla e zezë” nuk do ketë fund!