Zbardhen të tjera detaje nga operacioni i ndërmarrë nga Italia për shpëtimin e Alvin Berishës, 11-vjeçarit shqiptar, që kishte mbetur peng në kampin famëkeq të Al-HOl në Siri. Detajet u dhanë nga Francesco Rocca, drejtues i Kryqit të Kuq italian, i cili sqaroi se operacioni për lirimin e Alvinit nga kampi nisi sapo u identifikua.
“Operacioni mbahej sekret për shkak të gjendjes shëndetësore të fëmijës”, tha Rocca, ndërsa operacioni për shpëtimin e tij zgjati 25 ditë.
“Ne identifikuam fëmijën në kamp, u siguruam që ishte Alvini dhe më pas nisëm operacionin. Momenti më i vështirë ishte ai që drejtuesit e kampit nuk duhej të merrnin vesh që fëmija do të largohej, pasi ka prezencë radikale.
Edhe transferimi nga ‘Al Hol’ në aeroport ka qenë shumë i vështirë, pasi ndërlidhësit tanë ishin të frikësuar, edhe garancia që kishte për kalimin nga një zonë në tjetrën, ishte minimale. Në Damask e kam pritur unë. Kishim një presion dhe tension të madh që ta nxirrnim shëndoshë e mirë djalin, por kurdët kanë prioritet tjetër tani, ata menaxhojnë një kamp me 70 mijë persona. Falë vullnetarëve kurdë u bë e mundur që Alvini të shpëtojë.
Alvini mbeti i habitur kur hymë në Damask, shikonte gjithmonë rreth e rrotull, pasi ishte mësuar në kamp. Ai reagonte në gjithcka që ishte e re për atë. Ka edhe tre fëmijë të tjerë jetim që ndodhen në kamp në moshën e Alvinit. Tani edhe fëmijë të tjerë mund të largohen nga kampi. U nisëm në një moment kur të gjitha rrugët në Bejrut ishin të bllokuara.
Është një operacion që ka zgjatur 25 ditë”, tha Rocca.
Ndërkohë, mjekja e Kryqit të Kuq italian, që mori pjesë në operacionin për shpëtimin e Alvinit ka treguar detaje nga takimi me vogëlushin.
Sipas saj, Alvini ishte një fëmjë gjithmonë i qeshur dhe kjo do e ndihmonte atë të kalonte gjithë dramën e madhe që ka përjetuar.
“Ai është një kamp për jetimët, por Alvini nuk është ashtu, pasi ai ka babanë. Më në fund Alvini u largua nga kampi, arriti në Damask dhe Bejrut. Alvini ishte i buzëqeshur megjithë atë që ka kaluar, kartëvizita e tij është ajo.
Nuk flet më italisht, pak shqip, por mendoj se do ta rikuperojë, pasi familja e tij jeton në Itali. E patëm sigurinë se ai kishte besim te ne, se nuk pati në asnjë moment rezistencë. Qëndruam në hotel, ka ngrënë patatina, ka luajtur me telefon, ka qenë shumë i lëvizshëm, tani fillon jeta e tij e re, nuk mendoj se do të jetë e thjeshtë. Alvini nuk donte të flinte, donte të luante. Sot mbajtëm premtimin, që babai i tij i tha se do ta sillnim në shtëpi”, tha ajo.
