Manchester City kanë marrë garanci për një hyrje të sigurt në “Anfield”, për ndeshjen që do të zhvillohet ditën e diel.
Precedenti për këto masa sigurie që do të merren u vendos në prill të vitit 2018, përpara çerek finaleve të “Champions League”, ku shishe, fishekzjarre e sende të tjera u hodhën drejt mjetit me të cilin skuadra po futej në stadium.
Ndërsa klubet janë në dialog konstant përpara ndeshjes, siç është e zakonshme, raportohet që alarmi është ngritur nga ekzekutivët e Manchester City, ata presin që shqetësimi i tyre të merret seriozisht dhe duan garanci që incidenti i 18 muajve më parë të mos përsëritet.
Ndeshja që do të zhvillohet ditën e diel, në “Anfield”, ka një vlerë të madhe edhe për fatin e kampionatit, ku Liverpool kryeson renditjen në kuotën e 31 pikëve, ndërsa City e ndjek me 25 pikë, në vendin e dytë.
