Ish-sekretari i përgjithshëm i PD, Arben Ristani ka reaguar ashpër, pasi është marrë si i pandehur për akuzën e falsifikimit, për çështjen e famshme të lobimit në SHBA që nisi si akuzë politike nga PS dhe përfundoi si akuzë penale në gjykatë.
Ristani ka deklaruar se prokurorët që kanë ngritur akuzën nuk janë të qendrueshëm mendërisht.
“Kjo është një akuzë e pabazuar dhe dashakeqe, akuzohem se në deklarimin që PD ka bërë në KQZ, nuk janë pasqyruar të dhëna të vërteta, unë po them që nuk kam firmosur dhe as vulosur asnjë lloj dokumenti.
Në mënyrë të habitshme, joligjore, dhe jologjike përmendet emri im në këtë çështje, është një dashakeqësi idiote, paradoksale.
Shkuan deri aty sa thanë që është falsifikim i një mosveprimi, një vepër të tillë nuk mund ta mendojë as një person që nuk është mirë nga gjendja mendore”, kështu e ka cilësuar në një intervistë të dhënë në Fax News, ish-zyrtari i PD-së Arben Ristani, marrjen e tij si të pandehur për çështjen e lobimit rus.
Ai i ka quajtur prokurorët që kanë ngritur akuzën e falsifikimit të dokumenteve si jo të qendrueshëm mendërisht, dhe se çështjen do ta ndjekë deri në fund.
Ristani shtoi se do të ankohet te institucionet e Vetingut për prokurorët që e kanë marrë si të pandehur. Ristani shtoi se akuza për pastrim parash ka rënë.
