Nga Boldnews.al
Studiuesi dhe gazetari Dashnor Kaloçi po publikon, në seri, historinë tragjike të mjekut me origjinë hebraike, Natan Schachner, i cili vdiq në birucat e hetuesisë, në vitin 1973.
Në hulumtimin e tij, studiuesi ka intervistuar Mila Schachner (Çorati), ish-komuniste e orëve të para dhe Përgjegjëse e Rinisë në Brigadën e Dytë të Beqir Ballukut, e cila tregon gjithë historinë e bashkëshortit të saj me origjinë izraelite, Natan Schachner, që u zhduk në mënyrë misterioze nga Sigurimi i Shtetit në vitin 1973 në qelitë e Degës së Brendëshme të Durrësit.
Në rrëfimin e saj, bashkëshortja e mjekut tregon momentin e trishtë të arrestimit të Natan Schachner: “Më datën 11 janar të vitit 1973, që përkonte dhe me festën e Republikës, në shtëpinë tonë në qytetin e Durrësit, erdhën rreth 12 civilë të Sigurimit me në krye Kryetarin e Degës së Brendëshme të asaj kohe K.E. Në atë moment që ata hynë në mënyrë demostrative në shtëpi, Natani që po luante tavëll me dy shokë të tij, ngriu në vënd dhe nuk foli asnjë fjalë, kur ata i komunikuan se “në emër të popullit ishte i arrestuar”.
Më tej, bashkëshortja e mjekut hebre vijon rrëfimin e saj: “Unë u tremba dhe menjëherë zura të bërtisja duke u thënë se ai nuk kishte bërë asgjë, por njëri nga ata, një djal i ri i quajtur Vladimir Çuçi, me shumë dashamirësi gjeti momentin dhe më tha në italisht se unë nuk duhej të flisja. Pas arrestimit të Natanit, ata i bënë një kontroll të imët të gjithë shtëpisë dhe morën me vete të gjitha dokumentat e tij, si dhe dy libra të vëllait tim Agron Çoratit, të cilat i kishte shkruar gjatë kohës që ishte në internim në Zvërnec”.
Vijimi është kalvari i vuajtjeve disa-mujore, deri sa ajo mësoi për vdekjen e bashkëshortit të saj në hetuesi. Versioni zyrtar që iu përcoll nga autoritetet ishte që “Nathan Schachner kishte varur veten…”.
Në këtë histori, bie në sy një emër i përveçëm që përmend Mila Schachner (Çorati), në grupin e sigurmasve që i shkuan në shtëpi për arrestimin e bashkëshortit-ai ishte “sigurimsi i ri, që gjeti momentin dhe, me shumë dashamirësi, më tha në italisht se nuk duhej të flisja”-Vladmir Çuçi.
Në Regjistrin e Gjendjes Civile të shtetasve shqiptarë, rezulton vetëm një person me emrin “Vladimir Çuçi”. Ai është i datëlindjes 1948 dhe përmbush kriterin e “djalit të ri” në vitin 1973, sipas përcaktimit të znj. Mila Schachner (Çorati). Në atë vit, personi me emrin Vladimir Çuçi, i vit-lindjes 1948, ishte 25 vjeç.
Gjithnjë referuar Regjistrit të Gjendjes Civile, ky person, pra Vladimir Çuçi, rezulton të jetë xhaxhai i ministrit aktual të Bujqësisë, Bledar Çuçi.
Nuk ka të dhëna të tjera për të faktuar nëse Vladimir Çuçi-xhaxhai i Bledi Çuçit është i njëjti person apo jo me “sigurimsin” Vladimir Çuçi që përmend e veja e mjekut hebre, Natan Schachner, i vdekur në birucat e Hetuesisë, në vitin 1973.
