Ekipi i Napolit ndodhet në një kaos të madh, pasi në përfundimin e ndeshjes mbrëmë ndaj Salzburgut, zv/presidenti Eduardo De Laurentiis kishte dhënë një njoftim për mbledhje pas ndeshjes, por futbollistët në vend të zbatonin urdhrin, i janë drejtuar shtëpive të tyre.
“La Republica” rindërton ngjarjet që pasuan vërshëllimën e trefishtë të kryesorit, me futbollistët që iu drejtuan dhomave të zhveshjes, ndërsa presidenti Aurelio De Laurentiis ishte larguar nga “San Paolo”.
Pikërisht pas barazimit me ekipin austriak, futbollistët e Napolit, të drejtuar nga Lorenzo Insigne, janë përballur me tone të ashpra me zëvendëspresidentin e skuadrës, Edoardo De Laurentiis:
“Ne po kthehemi në shtëpitë tona, tregoi dhe babait tënd…”
Mësohet se futbollistët kanë marrë edhe mbështetjen e trajnerit Ancelotti për këtë vendim.
Ndërsa në lidhje me këtë çështje, presidenti nuk ka reaguar ende, autoriteti i të cilit është vënë në dyshim nga lojtarët. Por sipas mediave italiane lojtarët minimalisht rrezikojnë një gjobë të majme.
