Gazetarja Klodiana Lala ka zbuluar detaje nga hetimet që po bëhen ndaj Redjan Rrajës të arrestuar ditën e sotme nga Policia teksa po kalonte kufirin për në Malin e Zi pasi dyshohet se ka marrë pjesë në atentatin ndaj prokurorit Arjan Ndoja.
Lala tha në emisionin “Real Story” se gjurmët e Rrajës u gjetën në një palë syze që ndodheshin në makinën e braktisur nga autorët ndërsa sipas saj, Rraja e ka pranuar se syzet janë të tijat por jo se ka qenë njëri prej autorëve.
“Rraja është një emër jo pak i njohur. Ai është shoqëruar që të dielën në darkë nga policia, ka qenë një nga personat e shoqëruar.
Ai ka qenë duke udhëtuar me automjetin e tij drejt Hanit të Hotit. Ka qenë duke u larguar, ai ka thënë se ka qenë udhëtim i planifikuar. Një palë syze dielli e kanë lidhur me ngjarjen sepse janë gjetur në makinën e autorëve që u gjet në Shkafane.
Ai ka qenë i akuzuar për fshirjen e gjurmëve në vrasjen e Elton Çiços dhe gjurmët e tij të gishtave ishin të skeduara. Fillimisht ai ka mohuar çdo gjë. Kur është vënë përpara fakteve dhe syzet i janë vënë para ka pohuar që janë syzet e tij por ka mohuar që ka lidhje me ngjarjen”, tha gazetarja.
