PD i përgjigjet kryeministrit Edi Rama, i cili reagoi lidhur me arrestimin e Rredjon Rrajës, i akuzuar si i përfshirë në atentatin e 1 nëntorit ndaj prokurorit Arjan Ndoji.
“Përshëndes me respekt punën e shkëlqyer të Policisë së Shtetit për zbardhjen e ngjarjes kriminale, ku u implikua edhe prokurori i Durrësit. Brenda muajit Ligji Special kundër personave të dënuar, akuzuar a hetuar brenda/jashtë vendit për krim të organizuar apo krime të rënda… Dhe masat speciale kundër KÇK-së. Do t’i nxjerrim ‘ujë të zi’ foleve të krimit të organizuar dhe do të reagojmë frontalisht ndaj gjykatësve e prokurorëve të inkriminuar, që duan ‘të kapin ç’të kapin’, deri ditën kur kanë radhën e spastrimit nga Vetingu”, shkroi Rama në një postim në Twitter.
Në përgjigje, Sekretari i Përgjithshëm i PD-së shprehet se Rama mbrojti eksponentë të lartë të PS-së të lidhur me krimin.
“Kush e ka penguar Edi Ramen t’i nxjerrë ujët e zi, Elvis Roshit, Arben Ndokës, Arben e Mark Frrokut? Ai i mbrojti ata, edhe kur u faktua botërisht se ishin trafikantë, përdhunues, vrasës. Kush e ka penguar Edi Ramen t’i nxjerrë ujët e zi Tom Doshit e Vangjush Dakos, që janë në listën e zezë të SHBA, por sot, njërit i ka dorëzuar pushtetin në Shkodër, tjetrit në Durrës. Kush e pengoi Edi Ramen t’i nxjerrë ujët e zi Valdrin Pjetrit, Agim Kajmakut e Mark Babanit që i kandidoi në votimet e 30 Qershorit dhe i mbrojti deri në fund?! Kush e detyroi Edi Ramen ta mbrojë Rrahman Rrajen dhe bandën e tij, që kërcënon, dhunon, vjedh, por për ta drejtësia nuk ekziston, sepse ata sigurojnë pushtetin e Edi Ramës”, shprehet Bardhi.
“Edi Ramen e solli dhe e mban në pushtet krimi, prandaj pas çdo krimi qëndron një përfaqësues i Rilindjes. Edi Rama po u nxjerr ujët e zi vetëm qytetarëve të zakonshëm. Që kriminelët të shkojnë pas hekurave, që korrupsioni të mos gllabërojë çdo pasuri të këtij vendi duhet të largohet Edi Rama dhe të japë llogari para drejtësisë. Kryetar i organizatës KÇK është sot Edi Rama“, shton ai.
