Kreu i Postës Shqiptare, Laert Duraj ka bërë fajtor kompaninë e sigurisë për mos-reagim në kohë, në rastin e grabitjes së kasafortës me rreth 120 milionë lekë të vjetra mëngjesin e kësaj të Hëne, te posta e Krujës.
Për këtë ngjarje, deri më tani, është arrestuar vetëm roja i kompanisë private, i cili akuzohet se nuk ka njoftuar Policinë në kohë për grabitjen.
Në një deklaratë për gazetarët, Laert Duraj tha se kompnia e sigurisë nuk ka vepruar, duke sjellë largimin e autorëve, që ende mbeten të panjohur për policinë.
Ai theksoi se nga grabitja, posta nuk ka dëm monetar, pasi sipas marrëveshjes me kompaninë e sigurimit, është kjo e fundit që paguan dëmet.
“Zyra postare ka qenë brenda gjithë standardeve, sistemi monitorimit, vëzhgimit kanë funksionuar në mënyrë perfekte. Në sallën e monitorimit të kompanisë që është përgjegjëse për sinjalet janë çuar në kohë reale, si ai i parë për thyerjen e territorit të jashtëm, edhe ai i dytë për thyerjen e territorit të brendshëm, te kasaforta. Nga ana e tyre s’është respektuar procedura standarde ndaj grabitësit janë larguar me kasafortën. Jemi duke bashkëpunuar me autoritete. Megjithatë nga vëzhgimi i kamerave, përgjegjësia e kompanisë është e qartë. Çdo shumë që vidhet, sipas kontratës që kemi, do paguhet nga kompania. Megjithatë jeta vazhdon”, u shpreh ai.
Lexo edhe:
“Rastësia”/ Rrajat në atentatin ndaj prokurorit dhe në vjedhjen e 100 mijë eurove në Postën e Krujës
