Bashkia e Tiranës ka ekspozuar fotot e disa prej atyre që konsiderohen heronj dhe dëshmorë të popullit në bulevardin “Dëshmorët e Kombit”. Kjo ka ngjallur reagime të forta, duke e konsideruar një gjë të tillë si provokacion ndaj atyre që kanë vuajtur prej krimeve të komunizmit.
Ish-drejtori i Arkivës në Ministrinë e Brendshme, Kastriot Dervishi, përmes një postimi në rrjetet sociale kundërshton ekspozimin e fotove të heronjve, duke u ndalur te dy prej tyre, Nuri Luçi dhe Koçi Çako.
Në një postim në rrjet, Dervishi thotë se Nuri Luçi ka qenë ish-oficer i Sigurimit të Shtetit dhe ka bërë krime ndaj atyre që luftonin komunizmin.
“Në vitin 1948, i prerë në besë, rrethohet dhe vritet Frano Miri, bashkë me Zef Ded Përvukën. Pas vrasjes, kufomat e tyre çohen në Gurëz për të frikësuar popullin e zonës e madje u varrosën në bregore, jo në varrezat e fshatit, ku fshatarët nuk ngurronin të vinin natën lule dhe kurora.
Për këto veprime u lajmërua kryetari i Degës së Punëve të Brendshme Krujë, Nuri Luçi, i cili urdhëroi të nxirreshin kufomat nga varret dhe të hidheshin në breg të lumit Mat. Ashtu u bë. Natën, policët zhvarrosën kufomat dhe i çuan në një gropë në breg të lumit”, shkruan Dervishi.
Ndërkohë, në një postim tjetër, Kastriot Dervishi akuzon punonjësit e Bashkisë së Tiranës, të cilët sipas tij kanë ekspozuar dy foto të heroit Koçi Çako.
“Shokët e magazinës së dekorit të Çashkisë së Tiranës kanë vendosur dy herë në bulevard foton e Koçi Çakos.
Duke pasur mëdyshje të forta rreth përdorimit të germës ‘c’ dhe ‘ç’, emrin ia kanë shkruar ‘Koçi’. Vlen të theksohet edhe mungesa e vigjilencës revolucionare e kuratorëve të portreteve, shokëve të komitetit të veteranëve, të cilët shtohen nga viti në vit e nuk sosen kurrë. Në foto shihen dy portretet e Kocit, njëri në plan të afërt në të mëngjër dhe tjetri në sfond te semafori”, shkruan ai.
