Në Spitalin e Traumës në kryeqytet prej natës së të premtes qëndrojnë të shtruar dy shtetasit e plagosur në atentatin e ndodhur rreth orës 16:00 të ditës së djeshme tek mbikalimi i Shkozetit, Andi Maloku dhe Ladi Muharremi ose i quajtur ndryshe Aleksandër Laho. Ky i fundit thirret edhe me pseudonimin “Rrumi”. Laho, sipas të dhënave të fundit ka marrë dëmtime në nofull. Ndërkohë gjendja shëndetësore e shoferit të prokurorit Arjan Ndoja paraqitet më e rëndë. Mësohet se ai ka marrë plumba në të dy mushkëritë. I është nënshtruar një operacioni dhe tashmë pritet një përgjigje e dytë nga mjekët e spitalit.
Në ambientet e spitalit të Traumës, ka familjarë të të dy të plagosurve. Ndërkohë në Spitalin Rajonal të Durrësit ndodhet i shtruar prokurori Arjan Ndoja, i cili mësohet se është jashtë rrezikut për jetën, ndonëse ndaj tij është qëlluar me disa plumba.
Ndoja në të njëjtën kohë ka dhënë edhe shpjegimet e para për prokurorinë. Në krye të kësaj çështje ndodhet Prokurori i krimeve të Rënda, Anton Martini, i cili deri në këto momente ka bërë të mundur vetëm marrjen e provave materiale në vendin e ngjarjes dhe dëshmitë e të plagosurit Ndoja. Janë shoqëruar disa persona në policinë e Durrësit. Mes tyre edhe kunati i Lul Berishës, Plarent Dervishaj.
