Komisioni Qendror i Zgjedhjeve po shqyrton kërkesën e prokurorisë lidhur me ndërprerjen e mandatit për Agim Kajmakun, kryebashkiakun e Vorës.
Përgjigjja e Prokurorisë së Përgjithshme për Kajmakun u është shpërndarë të 5 anëtarëve të KQZ-së për të shqyrtuar aktet.
Gjatë mbledhjes së KQZ-së, Isuf Shehu, avokati i Agim Kajmakut, tha se verifikimet nga ana e prokurorisë janë të paplota.
“Prokuroria nuk ka arritur të sigurojë asnjë vendim të formës së prerë ndaj subjektit Agim Kajmaku. Letërporositë nga institucionet greke nuk kanë ardhur në organin e akuzës në Shqipëri. Kështu lind pyetja a është nisur kërkesa për këtë letërporosi?! Pa patur këto përgjigje nuk kemi një procedurë verifikimi të përfunduar.
Procedimi ndaj Kajmaku në Greqi është bërë plotësisht në mungesë të tij dhe në mungesë të dijenisë së tij. Ju të nderuar s’mund të merrni vendime mbi opinione qofshin këto edhe nga prokuroria”, tha avokati.
Ndërkohë, Prokuroria e Përgjithshme, në shkresën drejtuar KQZ-së e informon se Agim Kajmaku është i njëjti person me Jorgo Toton, ndaj të cilit, në Greqi, në Gjykatën e Janinës ka pasur një procedim penal për përdorim dhe shpërndarje të parave të falsifikuara.
Kajmaku në formularin e vetëdeklarimit nuk ka deklaruar një fakt të tillë, ccka do të thotë se në bazë të ligjit të dekriminalizimit, atij i ndërpritet mandati i Kryebashkiakut.
