Të shtëna me armë zjarri janë shënuar te mbikalimi i Shkozetit në Durrës këtë të premte. Për pasojë, u plagosën 3 persona. Ndër ta është edhe prokurori i Durrësit, Arjan Ndoja.
Ngjarja
Burime zyrtare bënë me dije se tre të plagosuri po lëviznin me makinë, kur nga një tjetër mjet, ndaj tyre është qëlluar me armë zjarri.
Një prej të plagosurve, Andi Maloku (shoferi i prokurorit), ndodhet në gjendje të rëndë, ndërsa prokurori Arjan Ndoji dhe i plagosuri tjetër Aleksandër Laho, janë jashtë rrezikut për jetën.
“Ne aksin rrugor Durrës – Tiranë në afërsi të mbikalimit të Shkozetit, rreth orës 16:30, në afërsi të vendit të quajtur ‘Mbikalimi i Shkozetit’ kanë qëlluar me armë zjarri në drejtim të mjetit me targa AA 333 ZD, e për pasojë janë plagosur shtetasit Aleksandër Laho, 48 vjeç, Arjan Ndoja 44 vjeç dhe Andi Maloku, 30 vjeç. Shtetasi Andi Maloku është nisur për mjekim të specializuar në Spitalin e Traumës në Tiranë, ndërsa dy shtetasit e tjerë ndodhen në Spitalin Rajonal Durrës, jashtë rrezikut për jetën. Policia e Durrësit është vënë në ndjekje të autorëve, po krihet zona dhe në të gjitha akset rrugore që lidhen me Durrësin janë ngritur pika kontrolli. Për zbardhjen e ngjarjes është ngritur menjëherë një grup i posaçëm hetimor nga Departamenti i Policisë Kriminale, Prokuroria e Rrethit Gjyqësor Durrës dhe Drejtoria Vendore e Policisë Durrës. Policia e Shtetit fton këdo që mund të ofrojë informacion në ndihmë të hetimit të shpejtë të ngjarjes të telefonojë falas në numrin 112”, njoftoi policia.
Hetimet i ka marrë në dorë Prokuria e Krimeve të Rënda. Prokurori i çështjes është Anton Martini. Dyshimet paraprake janë se kemi të bëjmë me një atentat ndaj prokurorit Ndoji për shkak të detyrës. Ndoji ka qenë së fundmi shënjestër e sulmeve të qeverisë për shkak të urdhër-arrestit që lëshoi ndaj Liridon Pulës, ish-kreut të Kadastrës në Durrës.
‘Lufta’ në Shkozet/ Në qendër të sulmeve të qeverisë, kush është prokurori i plagosur
I plagosuri tjetër Aleksandër Laho, njihet edhe si Landi Muharremi. Në shtator të vitit 2016, emri i tij u lakua si i dyshyar për rrahjen e biznesmenit libanez Faadi Mitri në sy të gruas dhe vajzës së tij. Dyshohet se Muharremi kishte pretendime mbi pronësinë e sipërfaqes së zonës turistike në zonën e Gjirit të Lalzit ku pritej që të investonte biznesmeni libanez me ndërtimin e një kompleksi, i cili pas dhunimit me shkop bejsbolli u largua nga Shqipëria. Për ngjarjen u arrestua Skënder Kraja ndërsa Muharremi u shpall në kërkim nga policia së bashku me kushëririn e tij.
