Sekretari i Përgjithshëm i OKB-së, Antonio Guterres tha se pauza e gjatë në dialogun Beograd-Prishtinë ndaloi përparimin drejt normalizimit të marrëdhënieve, gjë që hapi rrezikun e stabilitetit në këtë fushë.
Kriza e dialogut të ngrirë mes Kosovës dhe Serbisë ka kaluar dje një nivel më lart në skenën ndërkombëtare, teksa Sekretari i Përgjithshëm i Kombeve të Bashkuara, Antonio Guterres, në një prononcim të gjatë e të detajuar ka kërkuar shmangie të vonesave për dialogun. Duke kërkuar më shumë llogari nga Kosova sesa nga Serbia, Guteres tha se pauza e gjatë në dialogun mes Kosovës dhe Serbisë ka ndaluar përparimin drejt normalizimit të marrëdhënieve, gjë që hapi rrezikun e destabilizimit. “Formimi i shpejtë i një qeverie të re të Kosovës pas zgjedhjeve, do të bëjë që dialogu me Beogradin të mund të rifillohet shpejt, si dhe të heqë çdo pengesë për vazhdimësinë e tij. Ndërtimi i besimit të opinionit te autoritetet në Kosovë kërkon forcimin e sundimit të ligjit dhe një gjyqësor të besueshëm, të pavarur dhe të paanshëm”, tha ai. Në një raport të ri tremujor mbi punën e UNMIK që do të diskutohet në Këshillin e Sigurimit të OKB, Guterres përshëndeti përpjekjet që synojnë të sigurojnë përfshirje më të madhe të segmenteve më të gjera të shoqërisë në proceset politike në Kosovë, duke shtuar se veçanërisht inkurajon gratë dhe të rinjtë që të përfshihen dhe të udhëheqin në qeverisjen demokratike të Kosovës.
Sekretari i Përgjithshëm i OKB-së mirëpriti përpjekjet për të siguruar që viktimat e dhunës seksuale gjatë luftës në Kosovë të kenë të drejtën e kompensimit, por tha se procesi i kompensimit për viktimat nuk ishte plotësisht përfshirës. Guterres u bëri thirrje të gjithë aktorëve përkatës që të mbrojnë trashëgiminë fetare të Kosovës dhe të sigurojnë që vendet e adhurimit të jenë të sigurta, në mënyrë që të gjitha komunitetet të praktikojnë besimin e tyre në paqe. Ai gjithashtu u bëri thirrje institucioneve të Kosovës dhe aktorëve ndërkombëtarë që të vazhdojnë mbështetjen dhe bashkëpunimin e tyre të plotë në përpjekjet për të hetuar krimet e kryera gjatë luftës në Kosovë, të cilat ai i konsideroi thelbësore për të ardhmen paqësore të Kosovës. Në raport, Guterres përshëndeti përpjekjet e vazhdueshme të Grupit të Punës për Personat e Zhdukur si dhe ndryshimin e planifikuar në Ligjin për Personat e Zhdukur, duke thënë se sqarimi i fatit të të zhdukurve në Kosovë është thelbësor për arritjen e besimit afatgjatë.
Shtim i fondeve të komuniteteve
Guterres tha se ishte i zhgënjyer nga kontributet e vogla në Fondin për të mbështetur komunitetet minoritare në Kosovë, ashkali, egjiptian dhe romë, të prekur nga helmimi nga plumbi në Kosovë, dhe u bëri thirrje vendeve anëtare, aktorëve dhe organizatave të tjera që të kontribuojnë në këtë fond. Sekretari i Përgjithshëm i OKB-së shprehu shqetësim serioz për ndalimin e anëtarëve të UNMIK më 28 maj dhe vazhdimin e procedurave gjyqësore kundër tyre nga autoritetet e Kosovës, nga të cilat ai kërkoi të sigurojnë respektimin e privilegjeve dhe imunitetit të anëtarëve të OKB. Kreu i OKB i referohej incidentit me punonjësin rus të UNMIK, larguar tashmë nga Kosova. Secila palë tregoi versionin e vet për ngjarjen e 28 majit, kur gjatë një operacioni për arrestimin e personave të dyshuar për përfshirje në vepra kriminale, një punonjës i nacionalitetit rus të OKB në Kosovë u lëndua, arrestua, dhe lirua dhe u shpall persona ‘non grata’, pasi kishte vepruar haptazi në favor të serbëve etnikë për të penguar aktivitetin e kosovarëve në zonë. Zëvendësi i Sekretarit të Përgjithshëm të OKB, për çështjet ligjore, Miguel de Serpa Soares, ka bërë më herët një sqarim për rregullat juridike të imunitetit që ka stafi i OKB në Kosovë, rregulla të vendosura që në gusht të vitit 2000. Sipas tyre, “personeli i UNMIK është imun ndaj proceseve ligjore kur është duke kryer punën zyrtare”.
