Ish-kreu i KQZ-së Kristaq Kume në një komunikim telefonik me Fax News ka komentuar situatën e kryebashkiakut të Vorës, Agim Kajmakut, i cili ka gënjyer në formularin e dekriminalizimit.
Sipas Kumes, KQZ duhet të vendosë për shkarkimin e Kajmakut, dhe deri në zgjedhjet e reja në Bashkinë e Vorës, pushteti qendror do të drejtohet nga ana e nënkryetarit të Bashkisë.
“KQZ vihet në lëvizje nga ajo që i ka komunikuar prokuroria, në rastin konkret Kqz do ti ndërpresë mandatin të zgjedhurit në Vorë. Presidenti duhet të shpallë më tej dekretimin e datës së re të zgjedhjeve. Detyra duhet ti ngarkohet një prej nëkryetarëve të Bashkisë së Vorës, është i njëjti rast si i Shukri Xhelili në Dibër”, u shpreh Kume.
Ndërkohë që lidhur me mundësinë që presidenti të mos dekretojë një datë të re zgjedhjesh si në Shkodër, Kume u tha se do të duhet që të pritet vendimi i Gjykatës Kushtetuese.
“Në rast se presidenti nuk shprehet për këtë situatë, Bashkia do të drejtohet nga nënkryetari, sa kohë që Gjykata Kushtetuese të marrë vendimin për zgjedhjet e 30 Qershorit”.
“Nuk ka ngjashmëri me rastin e Valdrin Pjetrin, pasi ai nuk u betua dhe nuk e ka marrë mandatin. Sa kohë që Pjetri nuk u betua, detyrën duhet ta kryejë Voltana Ademi”, tha më tej Kume.
Ndërkohë që mbi mundësinë që Kajmaku të rimarrë mandatin e tij, Kume tha se shanset që kjo të ndodhë janë të pakta.
