Një shumë prej tridhjetë milionë e njëqind e njëzet mijë lekësh të reja do të alokohen nga fondi rezervë i buxhetit për aktivitete që do të zhvillohen me rastin 75-vjetorit të çlirimit të vendit. Vendimi i Këshillit të Ministrave, i miratuar më 16 tetor, ka hyrë në fuqi pas botimit në Fletoren Zyrtare, këtë të martë.
Ministria e Kulturës, Ministria e Mbrojtjes, Bashkia Tiranë dhe Radiotelevizionit Shqiptar janë përfituesit e këtyre fondeve.
Vendimi
Në vendimin e qeverisë sqarohet edhe ndarja e fondeve:
15.120.000 (pesëmbëdhjetë milionë e njëqind e njëzet mijë) lekë shtohen në programin “Trashëgimia kulturore dhe muzetë”, për mbulimin e shpenzimeve për aktivitetet e organizuara nga Ministria e Kulturës dhe Bashkia Tiranë.
10.000.000 (dhjetë milionë) lekë shtohen në programin “Arti dhe kultura”, për mbulimin e shpenzimeve për aktivitetet e organizuara nga Ministria e Kulturës.
Ministrisë së Mbrojtjes, në programin “Planifikim menaxhimi administrimi”, i shtohet fondi 3.000.000 (tre milionë) lekë për mbulimin e shpenzimeve të kryera nga Organizata e Veteranëve të LANÇ-it.
Radiotelevizionit Shqiptar, në programin “Prodhime filmike ose veprimtari artistike mbarëkombëtare”, i shtohet fondi 2.000.000 (dy milionë) lekë për mbulimin e shpenzimeve për aktivitetet e organizuara në bashkëpunim me Bashkinë Tiranë.
