Keivi Hysa, 28 vjeç nga Kurbini, i shpallur në kërkim ndërkombëtar nga drejtësia shqiptare për vrasje me paramendim në bashkëpunim dhe armëmbajtje pa leje, është ekstraduar nga Milano pas arrestimit në vendin fqinj. “Si rezultat i bashkëpunimit të Interpol Tirana me Interpol Romën, u bë i mundur arrestimi i tij në Itali dhe ekstradimi drejt vendit tonë”, njoftoi policia këtë të shtunë.
Hysa ishte shpallur në kërkim pasi Gjykata e Rrethit Gjyqësor Sarandë, në vitin 2015 ka caktuar masën e sigurisë “Arrest në burg” për veprën penale “Vrasje me paramendim e kryer në bashkëpunim”. Ngjarje që sipas hetimeve, ndodhi për motive të dobëta. Lidhur me krimin, autori i vetëm që mbetet në arrati është Elion Hysa, vëllai i Keivit. Ndaj Elion Hysës, Gjykata e Rrethit Gjyqësor Sarandë më 17 Korrik 2015, ka caktuar masën e sigurimit personal “Arrest me burg”.
Krimi
Në datë 10 Korrik 2015 rreth orës 01:00, në qytetin e Sarandës, si rezultat i një mosmarrëveshje për motive të dobëta të ndodhur një natë më parë me pronarin e një auto-lavazhi makinash Edmond Mehmetitn (të njohur edhe si Edmond Theodhori) , i kërkuari Keivi Hysa, në bashkëpunim me Elion Hysën, dhe Ledi Hysën, kanë vrarë me armë zjarri Mehmetin.
Arrestimi në Itali
Keivi Hysa u arrestua në Itali në shkurt të vitit të kaluar. Sipas raportimeve të medieve italiane asokohe, arrestimi i të riut shqiptar në Sesto San Giovanni të Milaos ishte rastësor.
Ai ishte duke lëvizur me makinë me një tjetër shqiptar, kur janë ndaluar nga karabinierët që më tej kanë zbuluar se Hysa ishte person në kërkim ndërkombëtar. 27-vjeçari përdorte pasaportë të falsifikuar.
