Kriza e thellë politike që ka përfshirë vendin prej muajsh është kthyer sërish në qendër të vëmendjes, pas refuzimit të nisjes së bisedimeve me BE javën që shkoi.
Opozita kërkon zgjedhje të parakohshme, ndërsa qeveria e drejtuar nga Edi Rama justifikohet se vendimi nuk erdhi për faj të Shqipërisë, por problemeve të brendshme të Europës.
Nga ana tjetër, është rikthyer edhe vëmendja e ndërkombëtarëve për tejkalimin e krizës politike.
Sipas Top Channel, në datat 28-30 tetor në Tiranë do të mbërrijnë dy raportues të Asamblesë Parlamentare të Këshillit të Europës. Gjermani Andrej Hunko dhe Joseph O’Reilly nga Irlanda.
Sipas axhendës së dy parlamentarëve, diskutimet e tyre parashikohet të fokusohen në krizën politike, reformën në drejtësi dhe luftën kundër korrupsionit.
Gjatë vizitës së tyre ata do të zhvillojnë takime me kryeministrin Edi Rama, Kryetarin e Parlamentit, Gramoz Ruçi, kryetarët e partive parlamentare dhe jo parlamentare dhe shoqërinë civile.
