Kryetarja e Grupit të Demokratëve në Parlament, Rudina Hajdari ka folur pas mbledhjes me dyer të mbyllura të Komisionit të Reformës Zgjedhore.
Ajo tha se janë ndarë grupet e punës që do të punojnë në tri drejtime, për të ndryshuar sistemin, për të korrigjuar paragrafët e Kodit Elektoral për pjesën e financimit të partive politike, po ashtu dhe për përfshirjen e emigranteve në votime. Hajdari tha se synimi i opozitës në parlament është të dobësojë rolin e kryetarëve të partive dhe të vendosë ndryshimin e sistemit në proporcional kombëtar me lista të hapura.
Ajo foli dhe për punën paralele që po bën PD dhe aleatët e saj, duke i quajtur ato si propozime virtuale, por të cilat do të merren në konsideratë nga Komisioni i Reformës Zgjedhore.
“Konstituam grupet e punës për sistemin zgjedhor dhe financimin e partive politike si dhe të drejtën e emigrantëve për të votuar. Synimi ynë është që të dobësojmë rolin e kryetarëve… Sistemi që synojmë është proporcional kombëtar me lista të hapura.Opozita jashtë parlamentit nuk deshi të vijë në këtë tryezë, por në mënyrë virtuale bëri disa propozime. Ne do i marrim në konsideratë.
Opozita jashtë parlamentit është mirë që të bëhet pjesë e Komisionit të Reformës Zgjedhor, por edhe nëse nuk duan të marrin pjesë ne do i marrim në konsideratë propozimet e tyre.
Duam që reforma zgjedhore nuk do të jetë me dy faza, apo me tre faza, por një reformë zgjedhore tërësore”, tha ajo. Hajdari ka folur dhe për faktin se ajo vazhdoj të jetë në krye të Grupit të Demokratëve, ndërkohë që qëndrimin e disa deputetëve për largimin e saj e ka quajtur si reagim prej “rebelësh”.
Rudina Hajdari tha se deputetët e grupit të saj janë “rebelë” sepse kanë dalë nga listat e PD-së dhe kanë refuzuar të zbatojnë urdhrin politik të PD.
Por ajo tha se ka ende votëbesimin e Grupit të Demokratëve, të cilët kanë zgjeruar radhët e saj me deputetë të rinj.
“Kam ende votëbesimin e deputetëve të Grupit. Kemi patur një takim me deputetët e rinj ditën e sotme dhe do të hartojmë një rregullore për funksionimin e grupit”, tha Hajdari.
