Gjykata e Shkodrës vendosi masën e arrestit me burg për Marash Arrajn, i dyshuar për vrasjen e kushiririt të tij, Lazër Arraj, pak ditë më parë.
Vendimi u dha nga Gjykata e Rrethit Gjyqësor Shkodër. Prokurorja e çështjes Esmeralda Ndoci kërkoi masën e sigurisë me afat 40 ditor për të pritur aktet e ekspertimit të rrobave dhe prova të tjera plotësuese.
Kërkesa e prokurorisë u pranua nga gjyqtarja Ermira Dedja, ndërsa i dyshuari nuk pranoi akuzat.
Prej mesditës së të hënës (21 tetor) kur u njoftua vrasja e 55-vjeçarit, forca të shumta policie dhe ato të FNSH zbarkuan me kontrolle në zona, ku bënë shoqërimin e disa të afërmve të viktimës dhe nisën marrjen e tyre në pyetje.
Të dhënat kontradiktore që fillimisht i kanë dhënë policisë, thuhet nga burimet, kanë ndihmuar të shkohet deri tek identifikimi i autorit.
Dy herë është qëlluar me armë zjarri në drejtim të viktimës, ndërsa ai po largohej nga fshati për tu kthyer në Shkodër, ku jetonte prej vitesh me familjen.
Motivi i vrasjes dyshohet se është një konflikt mes dy familjeve, por nuk përjashtohen as pista të tjera.
Ndaj 26-vjeçarit të arrestuar rëndojnë dy akuza “vrasje me paramendim” dhe “armëmbajtje pa leje”.
