Interi pret sonte, Borussian e Dortmundit në shtëpi, për javën e tretë të grupeve në “Champions League”.
Skuadra e Antonio Kontes është akoma pa fitore në kompeticion , pas barazimit me Slavia Pragën dhe një humbje të ngushtë me Barcelonën.
Kjo ndeshje për skuadrën nga Milano, është shumë e rëndësishme, ku fitorja është opsioni i vetëm për të luftuar për një nga 2 vendet e para që të mundësojnë dhe kalimin e grupit.
Në prag të kësaj sfide në konferencën për shtyp ka dalë trajneri i skuadrës, Antonio Konte:
“Të thuash se kjo ndeshje është si një finale, është e ekzagjeruar. Është një ndeshje e rëndësishme kundër një skuadre shumë të fortë. Por, është thjesht një ndeshje, finalet vijnë më vonë. Ne duhet të marrim tre pikët kundër çdo skuadre, jo vetëm ndaj Dortmundit. Ne kemi punuar që nga fillimi për këtë, dhe mund të kishim bërë më mirë kundër Slavias, por edhe ndaj Barcelonës.
Mungesat? “Nuk dua të flas për mungesat e skuadrës sime, apo të kundërshtarit. Ne do të përpiqemi të bëjmë një ndeshje të mirë. Ata janë një skuadër e fortë, të cilët kanë lojtar shumë të mirë.”
“Janë disa situata që kërkojnë shumë punë në stërvitje, është e pashmangshme që këto të ekzistojnë kur mbërrin një trajner i ri me ide të reja. Por le ta shohim edhe nga një këndvështrim tjetër, pasi në jemi skuadra e dytë që ka shënuar më shumë, pas Atalantës. Lautaro duhet të punojë akoma më shumë, nuk duhet të mendojë se goli është e vetmja gjë e rëndësishme për sulmuesin. Ai më pëlqen shumë kur punon me ekipin.”, u shpreh tekniku italian.
Grupi F, ku bën pjesë Interi, kryesohet nga Dortmund, në kuotën e 4 pikëve, e ndjekur nga Barcelona me pikë të barabarta, por me golavarazh më inferior, më pas në vendin e tretë ndodhet Inter, me vetëm 1 pikë pas 2 ndeshjesh, ndërsa grupin e mbyll Slavia e Pragës, dhe ajo me 1 pikë.
