Vllaznia ka arritur të marrë një fitore të rëndësishme 1-3 në transfertë përballë Flamurtarit, ndeshje e vlefshme për javën e nëntë të Kategorisë Superiore.
Në një ndeshje që ka qenë shumë e luftuar në pjesën e parë, shkodranët kanë bërë diferencën në të dytën duke përfituar edhe nga inferioriteti numerik i vendasve pasi Deliaj la ekipin e tij me 10 lojtarë.
Kruja i dha avantazhin kuqebluve në Vlorë por Sukaj u tregua i vëmendshëm që të barazonte shpejt shifrat për skuadrën vlonjate. Në fund të pjesës së parë, Deliaj tregoi mungesën e eksperiencës duke u ndëshkuar me një karton të verdhë të dytë të evitueshëm duke lënë skuadrën e tij me 10 futbollistë.
Kjo i dhamë shumë lirshmëri shkodranëve të cilët, pavarësisht vështirësisë që ndeshën për të gjetur avantazhin, ai erdhi me një skemë në goditje dënimi që mjaftoi për të qetësuar Jonuz e për të menduar për mbrojtjen. Në shtesën e takimit erdhi edhe goli i Uenderson i cili vulosi këtë sfidë duke bërë të mundur që Vllaznia të shkonte në vendin e dytë në renditjen e Superiores.
Më herët u luajtën sfidat Bylis-Tirana 3-1, Laçi-Teuta 3-0, Kukësi-Luftëtari 4-1, ndërsa nesër luhet supersfida Partizani-Skënderbeu.
Flamurtari-Vllaznia 1-3
34′ Sukaj/ 32′ Kruja, 72′ Krymi, 90’+3’ Uenderson
Flamurtari: Moçka, Pjeshka, Zeqaj, Gocaj, Deliaj, Muçollari, Nebihu, Rrapaj (66′ Vrapi), Hoxhaj, Sukaj (60′ Çelaj), Ribaj (77′ Vatnikaj).
Trajner. Dritan Sadedini
Vllaznia: Sherri, Gligorov (70′ Shehi), Malota, Gurishta, Godfrei, Kruja, Krymi, Ramadani, Zogaj (68′ Uenderson), Shtubina, Lika (56′ Bardulla).
Trajner. Mirsad Jonuz
KV: Deliaj, Ribaj, Vatnikaj / Ramadani, Gurishta
KK: Deliaj
Gjyqtar: A. Beqiri
