Nominimet për Çmimet Oscar për vitin 2020 nuk janë njoftuar ende, por që tani mendojmë se çmimin e meriton një kalë.
Jingang është një kalë i zgjuar që përdor talentin e tij në ‘aktrim’ sa herë dikush përpiqet t’i hipë në shpinë dhe të kalërojë me të. Edhe pse thuhet se kuajve u pëlqen puna e ‘rëndë’, Jingang me sa duket bën përjashtim.
Ai është aq përtac sa ka gjetur mënyrën për të mos mbajtur njerëz të bezdisshëm në shpinë.
Një video gazmore ku Jingang ‘shkrin talentin e tij në aktrim’, e cila është bërë virale, tregon kalin e zgjuar teksa bën sikur ka ngordhur në emër të ‘përtacisë’.
Jingang jo vetëm që shtrihet në tokë dhe rri pa lëvizur, por kujdeset që ta bëjë pjesën e plotë duke rrotulluar sytë e duke nxjerrë gjuhën jashtë.
Videoja gazmore është ndarë më shumë se 23 milionë herë, ndërsa kali ka tashmë një numër të madh fansash që i vlerësojnë përpjekjet e tij për t’iu shmangur punës.
