Nëpërmjet një emaili, zyra qendrore e OSBE-së ka informuar një prej banorëve të Astirit se ka nisur një proces të brendshëm trajtimi të incidentit të ndodhur pak ditë më parë në Tiranë, ku u përfshi ambasadori Berndt Borchardt.
Ajo shprehet se se shqyrtimi i gjestit të turpshëm të ambasadorit Borchardt është një çështje që i përket menaxhimit të brendshëm dhe se në lidhje me të nuk mund të jepen detaje shtesë.
Në e-mail, zyra e OSBE-së, e konsideron gjestin e ambasadorit të pahijshëm, por nga ana tjetër thekson se ky incident nuk mund të zymtësojë punën e bërë nga kjo organizatë në asistimin e kryerjes së reformave të fushave të ndryshme në Shqipëri.
Ambasadori i OSBE-së Bernd Borchard u tregoi gishtin e mesit qytetarëve të mbledhur para Drejtorisë së Policisë, për të protestuar për lirimin e bashkëbanorëve të tyre të arrestuar gjatë protestave të tyre te Unaza e Re. Teksa ata po thërrisnin “Rama Ik” ambasadori ngriti gishtin e mesit dhe u largua. Pak metra më tej, ai e tregoi sërish gishtin e mesit ndaj protestuesve, veprim ky që ka ngjallur një sërë reagimesh në opinion publik.
Borchard pranoi gjestin e turpshëm duke u kërkuar ndjesë banorëve të Astirit. Në një postim në llogarinë zyrtare të prezencës së OSBE-së në Tiranë në rrjetin social “Twitter”, ambasadori shkruan se respekton të drejtën e shqiptarëve për të protestuar.
“Do të doja t’u kërkoja sinqerisht ndjesë atyre që mund të kem fyer dje. Unë e respektoj të drejtën e shqiptarëve për të protestuar paqësisht”, ambasadori Borchardt.
