Kryetari i KLP-së Gent Ibrahimi, në një reagim të detyruar, ka justifikuar deklaratat e kryeministrit Edi Rama për “prokurorët dhe gjyqtarët “KÇK”.
Në një deklarate nga foltorja e parlamentit disa ditë më parë, Rama sulmoi prokurorë dhe gjyqtarë. Ai paralajmëroi madje një ligj të ri për të luftuar prokurorët dhe gjyqtarët e përfshirë në grupimin që e quajti “KÇK”, ku sipas Ramës, grupohen ata të cilët duke e ditur se nuk e kalojnë vetingun, abuzojnë me detyrën.
Deklarata solli reagime të shumta. Një prej tyre ishte i Shoqatës Kombëtare të Gjyqtarëve të Republikës së Shqipërisë dhe Unionit të Gjyqtarëve, që dënuan deklaratën. KLP nuk ishte reaguar dhe Unioni bëri apel që ky institucion të mbante një qëndrim.
Reagimi megjithatë, erdhi vetëm këtë të premte dhe në mënyrë të detyruar. Kreu i këtij institucioni, Gent Ibrahimi nuk i dënoi deklaratat e Ramës, por i quajti “politike”. “Kryeministri Edi Rama bëri një akuzë të përgjithshme dhe politike, si të tillë e kemi trajtuar edhe ne. Nuk është se po bëjmë një hetimit të thelluar, por po e shohim në përgjithësi. Nuk mjafton për të bërë gjyq”, tha Ibrahimi në përgjigjen e tij ndaj deputetëve të Komisionit të Ligjeve.
