Shqipëria nuk arriti të merrte për herë të katërt radhazi hapjen e negociatave për në Bashkimin Evropian, por për kryeministrin e vendit Edi Rama, ky nuk është aspak një problem i tij.
I pyetur nga gazetarët gjatë konferencës për mediat, se a do t’i kërkojë një mocion besimi të paktën parlamentit pas këtij dështimi Rama u përgjigj se nuk ka arsye.
Pyetje: Zoti kryeministër, a nuk mendoni se është momenti që pas kësaj përgjigje negative ju t’i drejtoheni parlamentit dhe të kërkoni një mocion besimi?
Rama: Mocion besimi mund t’i kërkoj parlamenti francez, këtij shqiptar nuk kam çfarë t’i kërkoj. Atij francez nuk ja kërkoj dot se nuk ka lidhje. Maqedonia e Veriut ka 4 vite që merr sinjale pozitive por asnjëherë ‘Po’. U detyrua të ndërrojë emrin, duke ju premtuar se po u bë kjo u zgjidh, dhe ja ku jemi. Kishte plot që thoshin se do ndahet Maqedonia e Veriut nga Shqipëria, se Shqipëria kështu e Shqipëria ashtu.
