Ndryshimi i ligjit për financimin e partive, referendumet si dhe ndërhyrjet në Kushtetutë për t’i dhënë zgjidhje çështjeve prioritare, janë pjesë e paketës që do të hartohet nga grupi i punës i ngritur nga Partia Demokratike në kuadër të Reformës Zgjedhore.
Në këtë grup pune, që kryesohet nga ish-deputeti Oerd Bylykbashi, bëjnë pjesë ekspertë ligjorë dhe zgjedhorë, ndërsa dokumenti do t’i dorëzohet edhe përfaqësive ndërkombëtare.
Në vëmendjen e demokratëve është garantimi i një procesi të lirë dhe të ndërshëm zgjedhor. Në këtë kuadër, partia më e madhe në opozitë, pritet të propozojë si prioritet votimin elektronik si një nga masat e para që do të shmangë manipulimin e votës përmes presioneve, shantazheve, shit-blerjes, apo numëruesve.
Po kështu sistemi zgjedhor, mundësia e pjeëmarrjes së emigrantëve në zgjedhje, si dhe administrata zgjedhore, pritet të jenë pjesë e propozimeve të opozitës.
Por, pavarësisht Kodit aktual Zgjedhor, i amenduar disa herë, dhe dokumenteve me propozime që po përgatiten nga opozita, apo atyre që kërkohen në raportin e OSBE/ODIHR, zbatimi i çdo ligji për të garantuar një proces zgjedhor të lirë dhe të ndershëm, ka të bëjë me vullnetin politik.
Në kushtet kur opozita akuzon Kryeministrin Edi Rama se nuk ka vullnet politik për të zbatuar ligjin, për të respektuar vullnetin e lirë të qytetarëve, atëherë ajo çka do të synojë opozita është një marrëveshje e garantuar nga ndërkombëtarët, për gjetjen e një zgjidhjeje efektive.
Opozita ka propozuar një komisioni me përfaqësues nga mazhoranca, opozita dhe ndërkombëtarë për reformën zgjedhore.
Në funksion është një komision parlamentar me përfaqësues të PS-së dhe asaj që quhet si “opozita e re”, që është angazhuar në reformën zgjedhore, por duket se gjithë veprimtaria e tij është në ngërç, përsa kohë opozita e bashkuar nuk e njeh punën e këtij komisioni.
Burime nga PD shprehen se krahas propozimeve të OSBE/ODIHR, në dokumentin e tyre do t’i jepet përgjigje çdo shqetësimi lidhur me zgjedhjet, ndërsa është kërkuar edhe ekspertizë ndërkombëtare nga partnerët dhe aleatët e partisë më të madhe opozitare.
