Ish-ministrja e Mbrojtjes, Mimi Kodheli, e ftuar në studion e lajmeve në RTV Ora u shpreh se ulja në tryezën e dialogut të opozitës jashtë parlamentit dhe asaj brenda tij, me qeverinë është një mundësi e mirë për të treguar pjekuri politike.
Kodheli tha se ka gjithmonë një dorë të shtirë nga qeveria për të ulur në tyrezën e diskutimeve opozitën.
Gazetarja: Nuk mendoni që është momenti pikërisht tani që mazhoranca dhe opozita jashtëparlamentare të ulen në tryezë për të miratuar reformën zgjedhore?
Mimi Kodheli: Ka gjithmonë një moment, ka qenë edhe më parë ky moment. Nuk është kapur si momenti i duhur për të bërë gjënë e duhur për të ardhmen e vendit, por ka gjithmonë një mundësi, një dritare të hapur, një dorë të shtrirë, sidomos në rastin e forcës politike që qeveris sot vendin për të ulur opozitën qoftë atë që është në rrugë dhe atë që është në parlament, për të mbledhur të gjitha forcat dhe për ta tejkaluar këtë ngërç politik. Nuk shikoj asgjë të pamundur. Ne kemi kaluar momente edhe më të vështira gjatë periudhës së tranzicionit dhe kemi mbërritur në konsensuse që kanë mundësuar ecjen përpara.
Unë i ftoj të gjithë qytetarët dhe politikën që ta marrin më të relaksuar edhe pritjen e lajmit. Është një teknikalitet që do të tejkalohet. Sido që të jetë, jam dëshirëplotë dhe optimiste e pashërueshme që unë mendoj akoma që ka një përgjigje pozitive për Shqipërinë dhe Maqedoninë e Veriut. Hapja e bisedimeve gjithsesi do të jetë në vitin 2020, nëse ka një përgjigje pozitive sot do të përgatiten për 2020. Ndërkohë midis këtij momenti tetorit të këtij viti dhe qershorit të 2020 do të kemi kohën e mjaftueshme për të demonstruar që ne mund të ulemi në tryezë, që ne mund të biem në konsensus, që ne mund të ndryshojmë shumëçka pa qenë nevoja që ta bëjmë me turbulenca të mëdha. Ulja në tryezë është një mundësi e mirë për të treguar pjekuri politike në këtë rast.
