Franca ka vendosur veton kundër hapjes së negociatave me Shqipërinë në takimin e Këshillit Europian, që zhvillon punimet më 17-18 tetor.
Presidenti Francës Emmanuel Macron u shpreh publikisht kundër, për shkak të numrit të madh të azilantëve shqiptarë që kanë pushtuar Francën. “E si mund t’ua mbush mendjen unë francezëve, kur shqiptarët janë të dytët në kërkesat për azil. Shqipërisë i liberalizuam vizat para hapjes së negociatave dhe sot përballemi me valën e azilkërkuesve”, tha Macron, duke bërë të qartë edhe vizionin e tij për BE-në.
Shanset që Shqipëria të marrë një “PO” për hapjen e negociatave janë minimale. Në kushte të tilla pritet që qeveria Rama të dështojë për vitin e katërt rradhazi në hapjen e negociatave, edhe pse vitin e kaluar Kryeministri Edi Rama deklaroi hapjen e tyre dhe sigurisht Rilindja hapi shishen e shampanjës për të festuar.
Madje për ta bërë situatën më të besueshme, pati reagimesh diplomatësh në Tiranë, përfshi edhe zyrtarë të Ambasadës së SHBA që uronin qeverinë për atë që ishte një arritje imagjinare.
Në të gjitha samitet e Këshillit Europian, Franca ishte një nga vendet skeptike, bashkë me Holandën dhe Danimarkën. Kryeministri Edi Rama është justifikuar me problemet e brendshme të këtyre vendeve, duke iu referuar veçanërisht qëndrimit të Holandës.
Ndërsa në lidhje me Francën, në maj të 2018, në një intervistë për TCH, Rama deklaronte se nuk do t’i ndahej Macronit derisa ta bindte për votën pro të Francës lidhur me negociatat.
Fakti që Macron bëri të qartë qëndrimin edhe në 16 tetor të 2019 kundër hapjes tregon se ose Rama nuk ka arritur t’a bindë, ose Presidenti francez nuk i ka dhënë hapësirën që Kryeministri t’a “kapte” dhe mos i ndahej.
Ja çfarë deklaronte Rama
Më duket kafshatë e vështirë. Kur do e takoni Presidentin Macron?
Rama: Tani për kafshata të vështira jemi këtu… se për kafshata të vështira kam ardhur unë në pushtet, se ndryshe mbanim Berishën.
Kur do takoni? Dhe a do ta magjepsni sërish?
Rama: Nuk ka një datë, por me siguri do ta takoj patjetër. Unë nuk i ndahem atij. Jo nuk është Parisi për tu magjepsur, është një person që duhet bindur.
Je optimist se një takim me atë do ta ndryshojë situatën për hapjen e negociatave?
Rama: Unë jam i vendosur për gjërat që duhet të arrij. Kjo është një gjë që duhet arritur dhe do bëj maksimumin.
Nëse nuk ndodh në qershor, ka një rast të dytë në dhjetor 2018?
Rama: Ajo që është e rëndësishme ështe se duhet të ndodhë brenda këtij viti. Kjo është absolute. Sepse vitin tjetër (2019) ka zgjedhje për parlamentin europian dhe s’do merret më vesh ca do bëhet. Brenda këtij viti duhet të marrim atë që na takon.