Gjon Menga, në kërkim nga autoritet shqiptare për një vrasje të ndodhur në vitin 2005 në Laç është arrestuar në Antwerp të Belgjikës. Lajmin e konfirmuan këtë të enjte mediat lokale.
Gjon Menga është dënuar me 25 vite burg në mungesë për vrasje. Referuar dosjes hetimore, ngjarja e rëndë ka ndodhur rreth orës 01:20 të pasdites rreth 14 vite më parë. Ku, Eris Trikthi, baba i tre fëmijëve, sapo kishte ndaluar në afërsi të shinave të trenit, pranë stacionit të Laçit, ku kishte takuar një kushëri të tij.
Në momentin që u nda me të dhe hipi në makinë për të marrë rrugën drejt hyrjes së qytetit i është afruar një burrë me skafandër në kokë, i cili sipas hetimeve ishte Menga.
Ky i fundit, ka nxjerrë pistoletën, duke e qëlluar disa herë Trokthin, nga dritarja e pasagjerit. Nga ekspertiza në vendngjarja dhe bazuar në dëshminë e vajzës që ka qenë në makinë me Trokthin, kjo e fundit e ka shtyrë me derën e makinës atentatorin. Ajo ka mundur të dalë nga makina, “Alfa Romeo”, me targë të huaja, ndërsa të njëjtën gjë ka bërë dhe 31-vjeçari, ndonëse i plagosur. Por, autori i ka dalë sërish para duke e qëlluar sërish, derisa i kanë mbaruar fishekët. Pranë vendit të krimit ndodhej një motor, me të cilin autori ka arritur të largohet në kohë. Krismat e armës së zjarrit dhe ulërimat e vajzës, dëshmitare të skenës së ekzekutimit kanë çuar personat e parë të rastësishëm në vendngjarje dhe më pas forcat e policisë.
Menjëherë është arritur të identifikohet viktima, ndërsa nuk ka qenë e lehtë për autorin. Sipas 20-vjeçares, ai mbante një skafandër në kokë, çka nuk i ka dhënë mundësi t’i dallonte fytyrën, duke përshkruar vetëm fizikun e tij.
