Kryeministri Edi Rama është nisur sot drejt Brukselit, aty ku në datën 17 dhe 18 tetor, do të zhvillohet mbledhja e kryetarëve të qeverive të vendeve anëtare të BE-së, ku krahas Brexit dhe Sirisë, do të merret edhe një vendim për hapjen ose jo të negociatave me Shqipërinë dhe Maqedoninë e Veriut.
Rama ka njoftuar nisjen drejt Brukselit, aty ku dy ditë më parë ka qenë Gramoz Ruçi dhe Taulant Balla, përmes rrjeteve sociale, ndërsa lajmëron mbi përpjekjet e Gjermanisë dhe kancelares Angela Merkel, për të bindur vendet skeptike, ku përfshihen Franca, Danimarka dhe Holanda.
“Kancelarja Angela Merkel dhe Gjermania po përpiqen për një “po” për të dyja vendet, ndërkohë që qëndrimi i Presidentit Macron dhe i Francës nuk përkon të paktën për momentin me atë të Gjermanisë dhe të shumicës dërrmuese të vendeve anëtare.
Nuk jam as optimist dhe as pesimist për rezultatin e këtij procesi, por me realizëm gjykoj se po behet maksimumi për të marrë PO-në e merituar dhe më e mbështetur se sot me thënë të drejtën Shqipëria nuk ka qenë më e mbështetur se kësaj radhe”, tha Rama.
Rama tha se drejt Bruskelit do të udhëtonte edhe kryeministri i Maqedonisë së Veriut, Zoran Zaev.
