Përplasjet te Rilindja/ Jep dorëheqjen zyrtari i bashkisë së Durrësit

Adhurim Qehajaj ka dhënë dorëheqjen nga funksioni i kreut të Urbanistikës në Bashkinë e Durrësit.

Qehajaj mbante detyrën e Drejtorit të Planifikimit, Kontrollit dhe Zhvillimit të Territorit në Bashkinë Durrës që prej muajit prill 2009.

Dorëheqja e tij vjen pas asaj të Drejtoreshës së Burimeve Njerëzore, Drita Zeneli, e cila u largua nga posti për arsye shëndetësore në fillim të muajit shtator.

Shumë prej zyrtarëve të Bashkisë së Durrësit, që kanë punuar me ish-kryebashkiakun Vangjush Dako, janë vënë nën presionin e dorëheqjeve dhe largimeve, pasi drejtimin e bashkisë së qytetit bregdetar e mori Valbona Sako, pas votimeve të 30 qershorit.

Në javët e fundit janë raportuar disa përplasje mes klaneve në Partinë Socialiste në Durrës, që kanë përfshirë jo vetëm strukturat e partisë, por edhe pozicionet kyçe në bashki dhe institucione të tjera vendore.

LEXO EDHE  Humbja në zgjedhje, analisti: Fushata e liderit e mirë, ja ku çaloi

Adhurim Qehajaj, u pezullua nga detyra me vendim të gjykatës në 13 mars 2018, pasi akuzohej për shpërdorim detyre nga prokuroria, për dhënien e një lejeje ndërtimi në afërsi të Urës së Dajlanit, e cila konsiderohet zonë me rëndësi kombëtare, pasi është vetëm 20 metra larg detit.

Sipas prokurorëve, kjo leje është në kundërshtim më kriteret e ligjit, pasi në zona të tilla organ kompetent për t’i miratuar është Këshilli Kombëtar i Territorit.