Nga Boldnews.al
Dy fëmijët e shtetasit Y.M., kanë arritur të fitojnë një dëmshpërblim të plotë për vdekjen e babait të tyre në një aksident tragjik, pas një beteje shumë-mujore gjyqësore me kompaninë e sigurime “Ansig”.
Gjykata e Apelit të Tiranës, në një vendim të datës 14 Janar 2019, vendosi që trashëgimtarët e ligjshëm të shtetasit Y.M. të dëmshpërblehen në vlerën e rreth 7.5 milionë lekëve, kundrejt 1.25 milionë lekë që kishte vlerësuar për ata kompania “Ansig” sha.
Në Nëntor 2015, shtetasi Y.M., ishte një ndër dy viktimat e aksidentit të ndodhur në zonën e “Ura e Qehasë”, në rrugën Elbasan-Tiranë, pasi automjeti i drejtuar nga një tjetër person humbi kontrollin dhe doli nga rruga.
Prokuroria e Elbasanit konstatoi se fajtor për aksidentin ishte drejtuesi i mjetit, A.S. Por, duke qenë se edhe ky person humbi jetën në përplasje, hetimet u pushuan.
Shtetasi Y.M., 45 vjeç në kohën e aksidentit, ishte i divorcuar dhe dy fëmijët e tij ishin lënë nën përgjegjësinë e së ëmës. Gjithësesi, gjykata, në vendimin për divorc, kishte ngarkuar babain që të paguante për fëmijet një pension në vlerë 45.000 lekë në muaj.
Aksidenti tragjik u shkaktoi fëmijëve jo vetëm dëm moral, për shkak të vdekjes së babait, por njëkohësisht edhe dëm financiar, pasi humbën të ardhurat që përfitonin prej tij nga pensioni.
Për këto arsye, dy fëmijët e Y.M., i drejtojnë një kërkesë për dëmshpërblim kompanisë së sigurimeve “Ansig” sh.a, në të cilën ishte siguruar mjeti i përfshirë në aksident.
Kompania “Ansig” e ka njohur rastin e sigurimit dhe ka konkluduar se shuma e dëmshpërblimit është në vlerën 1.250.000 lekë (njëmilion e dyqind e pesëdhjetë mijë lekë). Në vlerësimin e saj, kompania “Ansig” ka vlerësuar se shtetasi Y.M. ka qenë i vetëm në çertifikatë familjare (fëmijët jetonin me ish-bashkëshorten).
Trashëgimtarët e ligjshëm të Y.M., dy fëmijët e tij, nuk kanë qenë dakord me këtë vlerësim nga kompania e sigurimeve “Ansig”, të cilin e kanë konsideruar shumë të ulët.
Për këtë arsye, ata i janë drejtuar me një padi Gjykatës së Tiranës, në të cilën kërkonin një dëmshpërblim më të drejtë nga ana e kompanisë “Ansig”.
Proceset gjyqësore
Gjykata e Tiranës, për një vlerësim më të plotë të rastit, thirri një ekspert. Ky i fundit, në aktin e tij, vlerësoi se fëmijët e shtetasit Y.M. përfitonin dëmshpërblim pasuror dhe jo-pasuror në vlerë totale rreth 7.5 milionë lekë, një shifër disa herë më e lartë se sa vlerësimi që kishte kryer kompania “Ansig” për rastin.
Gjykata e Tiranës, duke u mbështetur në aktin e ekspertimit, me vendimin e datës 23 Maj 2018, ka vendosur se kompania “Ansig” sh.a duhet të dëmshpërblejë fëmijët e shtetasit Y.M., në vlerën e rreth 7.5 milionë lekëve.
Kompania “Ansig” sha e ka kundërshtuar këtë vendim në Gjykatën e Apelit të Tiranës. Përfaqësuesi i kompanisë së sigurimeve ka theksuar se “Ansig” e ka pranuar përgjegjësinë për dëmshpërblimin, por nuk është dakord me vlerën e përcaktuar nga gjykata e shkallës së parë.
Ndër argumentat e paraqitura në Gjykatën e Apelit nga “Ansig” për të mbështetur qëndrimin e saj, ishte edhe fakti që shtetasi Y.M ishte i vetëm në çertifikatën familjare dhe, për këtë arsye, dëmshpërblimi duhej llogaritur pikërisht mbi këtë situatë.
Gjykata e Apelit të Tiranës, pasi dëgjoi palët, vendosi në 23 Janar 2019 që të linte në fuqi vendimin e shkallës së parë, në bazë të të cilit fëmijët e Y.M përfitonin dëmshpërblim në vlerën e rreth 7.5 milionë lekëve.
Në argumentat e saj, gjykata e Apelit thekson se, pavarësisht se i aksidentuari Y.M. ishte i vetëm në çertifikatë familjare, ai gjithësesi kishte detyrime financiare për fëmijët e tij që jetonin me të ëmën pas divorcit.
Gjykata e Apelit risolli në vëmendje se, në momentin e aksidentit fatal, shtetasi Y.M. ishte i ngarkuar me përgjegjësinë për të paguar pension për fëmijët e tij në vlerën 45 mijë lekë në muaj.
Për këtë arsye, vlerësoi gjykata e Apelit, humbja e jetës së shtetasit Y.M., krahas dëmit moral e shpirtëror për humbjen e babait, shoqërohej edhe me humbje financiare për dy fëmijët e tij.
Në vlerësim përfundimtar, Gjykata e Apelit të Tiranës rrëzoi pretendimet e “Ansig”, duke vendosur përfundimisht se kompania e sigurimeve duhet të paguajë vlerën e rreth 7.5 milionë lekëve.
