Kryeministri Edi Rama tha se përtej faktit se Shqipëria dhe Maqedonia e Veriut meritojnë hapjen e negociatave pa kushte, përtej faktit të përmbushjes së detyrave të shtëpisë, është me rëndësi që ky proces të shikohet me sytë e interesit të përbashkët, si të BE-së ashtu edhe Rajonit.
Në konferencën e përbashkët me Kryeministrin italian, Xhuzepe Konte, Rama tha se procesi i reformës në drejtësi dhe ai i integrimit europian, do të shtojë bashkëpunimin mes Shqipërisë dhe Italisë, sidomos në thellimin e bashkëpunimit ekonomik.
“Padiskutim që vizita e Konte është në kuadër të një javë shumë të rëndësishme për BE dhe Shqipërinë.
Dua ta falenderoj kryeministrin që në koherencë të plotë, për asnjë moment nuk është lëkundur në mbështetjen ndaj Shqipërisë në perspektivën e këtij rajoni në BE.
Përtej faktit që Shqipëria dhe Maqedonia i kanë kryer detyrat, është në interesin tonë dhe të tyre që ky proces të shkojë para.
Ne nuk jemi këtu se na e kërkon Berlini, apo Parisi por sepse na e kërkon e ardhmja për të ndërtuar një shtet të së drejtës.
Së fundi prekëm me kryeministrin aspektin e marrëdhënieve bilaterale. Marrëdhëniet janë pa asnjë shqetësim, qasëm faktin që procesi i reformës në drejtësi përbën një shtyllë të fortë mbështetëse për rritjen e këtij bashkëpunimi”, tha Rama.
