Franca bllokoi sot arritjen e një marrëveshjeje gjatë takimit të ministrave të Jashtëm të BE-së, në Luksemburg, për hapjen e negociatave me Shqipërinë dhe Maqedoninë e Veriut, raporton Bloomberg.
Takimi i ministrave të Jashtëm të BE përfundoi pa marrëveshje, megjithëse Johannes Hahn dhe ministrja e Jashtme e Finlandës, u shprehën besimplotë se situata mund të ndryshonte.
Parisi kishte mbështetjen e Holandës gjatë përpjekjeve për të bllokuar nisjen e negociatave, në veçanti me Shqipërinë.
Gjatë diskutimeve u shfaq një propozim i ri, që e ndante Shqipërinë nga Maqedonia e Veriut, e cila do të niste menjëherë negociatat. Por as ky propozim, që nisi të merrte mbështetje, nuk u pranua nga Franca.
Tashmë kjo çështje pritet të kalojë për diskutim në samitin e krerëve të shteteve dhe qeverive, të enjten dhe të premten. Mirëpo ky samit do jetë i ngarkuar për shkak të diskutimeve për Brexit dhe çështjen e sulmeve turke në Siri.
Shpresat e Shqipërisë janë në fije të perit. Franca ka vendosur veton, dhe vetëm nëse presidenti francez, Emmanuel Macron ndryshon mendje në minutat e fundit, gjërat mund të marrin për mirë.
Një diplomat tha për AFP se të gjitha opsionet mbeten të hapura deri në fund.
Një përfaqësues i qeverisë gjermane tha se kancelarja Angela Merkel do e trajtojë me Macron këtë temë të mërkurën në Këshillin e Ministrave franko-gjerman.
Gjermania po lobon deri në fund që Shqipëria të marrë një sinjal pozitiv, që nënkupton nisje të negociatave me kushte.