Nga Boldnews.al
Ministri i Brendshëm Sandër Lleshaj çdo herë që reagon habit shumë, edhe pse kurrë nuk heq dorë nga qëndrimet e tij, që në fund rezultojnë qesharake. Në fjalën e tij të mbajtur në Këshillin Kombëtar për Integrimin Europian, Lleshaj ka folur për luftën ndaj krimit të organizuar.
Ai tregoi sesi i ishte përgjigjur pyetjes së një gazetareje, e cila e kishte pyetur për goditjen e peshqve të mëdhenj. “A ka goditje të krimit të organizuar, dhe një gazetare shqiptare se shqiptarët janë interesantë: A keni goditur peshqit e mëdhenj? Së pari, të biem dakord për përkufizimin “peshk i madh”.
Se ka një bindje sikur krimi i organizuar është aq i organizuar sa ka një kre. Sikur do godasim Pablo Eskobarin. Por unë mund t’ju them se në vitin 2019, kemi një rritje me herë në numrin e grupeve të goditura nga Policia e Shtetit. Janë zhvilluar 18 operacione të mëdha, kundër grupeve të organizuara kriminale. Nëse në 2018 janë shkatërruar 10 grupe, në 2019, për të njëjtën periudhë janë zhvilluar 22 të tilla”, thotë Lleshaj.
E me të drejtë grepi i hedhur nga ministria dhe kokat e policisë nuk do kapin kurrë atë “peshkun e madh” të krimit të organizuar dhe korrupsionit. Ata po “gjuajnë” në një kavanoz gogozharesh, ku kridhet ndonjë peshk i kuq akuariumi, i cili vlen vetëm për statistikë, në dalje publike dhe në gjoja raporte ndërkombëtare për luftën kundër krimit të organizuar.
Sot ministri i Brendshëm ka bindje se në vendin tonë nuk ka peshq të mëdhenj. Nëse do e kishte seriozisht që krerët e krimit të organizuar dhe korrupsionit të viheshin para drejtësisë ministri duhet të ndryshojë vendin ku duhet të “gjuajë”. Ai mjafton që të hedhë “grepat” në atë tavolinë ku ulet gjithnjë në mbledhjen e qeverisë. Me siguri do gjejë jo peshq të medhnj, por peshqenë që ushqehen me parën publike, me koncesione apo afera të tmerrshme në infrastrukturë.
Gjuetia do i shkojë mbarë edhe nëse nis të gjuajë në atë Parlament që sot është kthyer në një pijetore të madhe ku dalin ligje që ndëshkojnë çdo frymë opozitarizmi dhe reagimi qytetar. Do të gjejë patjetër deputetë të lidhur me krimin elektoral, që miqësinë e kanë me trafikantë droge, apo të dënuar për shfrytëzim prostitucioni. Padyshim që peshq të mëdhenj ka aty, por grepi nuk hidhet aty ku duhet.
Gjenerali me spaleta të humbura sot nuk është gjë tjetër përveçse një i dërguar politik i Rilindjes në qarkun e Lezhës. I humbur në benefitet e pushtetit ministri sot deklaron se në Shqipëri nuk mund të gjesh Pablo Eskobarë”. Po si është e mundur që në një vend ku kanabisi përfundon me qindra ton në Itali dhe Greqi nuk ka bosë të mëdhenj? Si është e mundur që vetëm në tre raste zbulohen 1.3 ton kokainë dhe në burg përfundon shoferi?
Ata bosët e kokainës a janë “peshq të mëdhej” gjeneral? Mund të duken fare të vegjël, pasi nuk duan të shohin përpëlitjet e “bishave” të cilët janë të lidhur me drejtuesit e qeverisë. Thjesht ministri po gjuan në një kavanoz gogozharesh!
