Persona të maskuar dhe të armatosur kanë grabitur sende me vlerë në një banesë në Korçë. Ngjarja e rëndë ka ndodhur mbrëmjen e sotme në lagjen nr.3.
Nga të dhënat e para mësohet se në banesë jetonin një çift të moshuarish.
Sipas të dhënave të para, grabitësit nën kërcënimin e armës kanë marrë para dhe sende me vlerë në banesën e të moshuarve.
Policia ka shkuar në vendin e ngjarjes dhe ka nisur hetimet.
Njoftimi i policisë:
Më datë 14.10.2019, rreth orës 21.45, në lagjen nr.3, dy persona ende të pa identifikuar, dyshohet se njëri kishte armë zjarri tip pistoletë kanë hyrë në banesën e shtetasve F.R dhe A.R, rreth 85 vjeç, duke ushtruar dhunë psikologjike, kanë marrë një sasi lekësh dhe më pas janë larguar me shpejtësi.
Dy të moshuarve u është dhëna ndihma e parë mjekësore, pa probleme për jetën.
Grupi hetimor po punon për identifikimin dhe kapjen e autorëve, si edhe zbardhjen e plotë të rrethanave të ngjarjes.