Ambasadorja franceze në vendin tonë, Christine Vasac deklaroi se “dosja e hapjes së negociatave për Shqipërinë është shumë e rëndësishme, sepse ne jemi miqësi e vjetër me Shqipërinë dhe Maqedoninë e Veriut”.
Duke iu përgjigjur interesimit të gazetarëve, Vasac deklaroi nga Korça se një takim është zhvilluar një ditë më parë mes dy liderëve, atij të Francës Emanuel Makron dhe kancelares gjermane Angela Merkel. Vasac la të kuptohet se në takim u diskutua edhe për vendimin që do të merret për Shqipërinë.
“Nuk dua të fshihem pas gishtit. Ju keni ngritur pyetjet për rrugën europiane. Ju prisni, ne presim të gjithë bashkë përgjigjen e rëndësishme. Ne nuk dimë çfarë vendimi do jepet. Ky vendim do merret në unanimitet. Dje kancelarja Merkel dhe Macron janë takuar në një takim të rëndësishëm. Janë pyetje që na shpëtojnë dhe nuk i kapim dot. Është e vërtetë që Shqipëria dhe Maqedonia e Veriut presin një vendim për hapjen e negociatave për në BE. Por ka subjekte që janë po aq të rëndësishëm siç është çështja e BREXIT. Ky është një problem i madh jo vetëm për Francën, por gjithë vendet e Europës dhe na intereson të gjithëve. Por ka gjithashtu subjekte të tjera siç është subjekti i evenimenteve në Siri. Është gjithmonë kështu. Aktualiteti vonon mbledhjet e veta. Por dijeni që dosja e hapjes së negociatave për Shqipërinë është shumë e rëndësishme sepse ne jemi miqësi e vjetër me Shqipërinë dhe Maqedoninë e Veriut”, tha ambasadorja.
Së fundmi, në media është raportuar se Franca, bashkë me Holandën dhe Danimarkën, renditen ndër vendet që nuk preferojnë të hapin negociatat e BE-së me Shqipërinë. Zyrtarë të lartë të Francës kanë shprehur si shqetësim numrin e lartë të shqiptarëve që kërkojnë azil në shtetin e tyre.
Ndërkohë, vetë kryeministri Edi Rama është shprehur pësimit për një vendim pozitiv të vendeve anëtare të unionit për hapjen e negociatave.
