Policia britanike ka zgjedhur një rrugë pak të çuditshme, duke i dërguar mesazhe 2 mijë klientëve të një bande shqiptare të drogës, duke i ofruar mbështetje për abuzimin me lëndët narkotike.
Banda furnizonte me kokainë njerëzit që punojnë në qendrën financiare të Londrës. Numrat celularë të të prekurve u gjetën në dy telefona të sekuestruar nga një rrjet shqiptar i krimit të organizuar.
Mesazhi në tekst thoshte se tregtarët me të cilët ata ishin lidhur me telefon ishin arrestuar dhe klientët e tyre ishin duke u kontaktuar për t’u ofruar ndihmë.
Një mesazh, i cili është dërguar 1.852 herë në Britani, ofroi këshilla dhe mbështetje për abuzimin e substancave.
Dy drejtuesit e rrjetit, ishin Bledar Ponari, 28 vjeç dhe Fjoralb Fera, 21 vjeç.
Policia e qytetit të Londrës gjurmoi 12 shqiptarë që u kapën me 1.2 kg kokainë me vlerë 144,000 £, dokumente të rreme identiteti dhe 20,000 £ para të gatshme.
Ata u dënuan me 25-64 muaj nga gjykata mbretërore në Londër dhe Old Bailey, gjatë 12 muajve të fundit, shkruan Panorama.
Korrierët e grupit shpërndanin nëpërmjet telefonave lëndë narkotike në rrethin financiar të kryeqytetit britanik.
Detektivi Konstable Lee Johnson, i cili drejtoi hetimin prej tetë muajsh, tha se njerëzit që përdorin drogë nuk ishin të vetëdijshëm se ata po ushqejnë krimin e dhunshëm dhe skllavërinë.
