Gjykata e Kavajës ka dhënë masën e sigurisë arrest me burg për policin e Burgjeve, Bledar Toçi, pas krimit që tronditi qytetin tre ditë më parë. Efektivi i burgjeve akuzohet për vrasje, pasi në banesën e 30-vjeçares, Marsida Qatja, qëlloi për vdekje Dritan Haxhollin, që sipas hetuesve dyshohet të jetë ish i dashuri i Qatjas. Bledar Toçit iu kominikua masa e arrestit me burg në spital, ku ndodhet pasi u plagos në qafë ditën e ngjarjes.
Gjithashtu, Gjykata la në burg edhe vëllain e policit, Bernard Toçi. Ky i fundit akuzohet për posedim të lëndëve narkotike. Gjatë kontrollit nga policia, në banesën e tij u gjetën doza kokaine. Por sot gjatë seancës gjyqësore, babai i tij ka bërë një deklaratë të papritur. Duke dorëzuar një akt noterial, ai ka deklaruar se kokainën e përdorte vetë për efekt qetësues, duke pranuar kështu se është posedues i drogës së fortë. Mesa duket, deklarata nuk bindi gjykatën që la në qeli Bernard Toçin.
Paraprakisht, dyshohet se si viktima kishte lidhje sentimentale me Marsida Qatja, megjithëse ajo e ka mohuar këtë në intervistat televizive pas ngjarjes. Qatja, siç ka deklaruar vetë, kishte kërkuar ndihmën e Toçit, pasi ky i fundit e shqetësore duke i kërkuar të kryenin marrëdhënie intime. Orët e para të mëngjesit të 10 tetorit, Dritan Haxholli shkon i armatosur te banesa e Qatjas. Aty, pas një shkëmbimi zjarri mbetet i vdekur Haxholli dhe i plagosur Toçi. Policia njoftoi se krimi ndodhi për motive xhelozie.
