Vazhdon telenovela e dëhsmive lidhur me ngjarjen e ndodhur në Kavajë dy ditë më parë, ku në banesën e shtetases Marsida Qatja u vra një person dhe mbeti i plagosur një efektiv policie.
“Në mbrëmje- thuhet në dosje,- Marsida Qatja, Bledar Toçi dhe dy të tjerët kanë konsumuar alkool dhe kokainë. Pak minuta pas mesnate, tek shtëpia e gruas ka shkuar Dritan Haxholli, i cili ka goditur dritaren e katit të parë me qytën e automatikut që kishte fshehur poshtë xhaketës’. “Nëna e tre fëmijëve e ka ftuar të hyjë në shtëpi”, raporton “News24”.
Në dosje po ashtu thuhet se fillimisht Dritan Haxholli i ka drejtuar armën Xhulio Biturkut, duke i thënë se “me ty kam punë pastaj”. Ndërsa Bledar Toçit i është drejtuar me fjalët “pse ma bën ti këtë” dhe menjëherë ka qëlluar me automatik në drejtim të tij, duke e plagosur lehtë në qafë. Zyrtari i burgut të Durrësit i është kundërpërgjigjur dhe me armën e shërbimit ka derdhur plot 17 plumba mbi Dritan Haxhollin.
Prokuroria e Kavajës e ka rimarrë në pyetje Marsida Qatjan, por edhe të gjithë personat e përfshirë në ngjarjen e ndodhur pas mesnate në apartamentin e 30-vjeçares.
Autori i dyshuar i ngjarjes, Bledar Toçi, mësohet se nuk ka folur në lidhje me krimin, duke thënë vetëm fjalinë: “Pse nuk vdiqa edhe unë…”.Ndërsa personazhet e tjerë, duke përfshirë Marsida Qatjan dhe dy miqtë e saj, Xhuljo Biturku dhe Ermir Çela, kanë dhënë versione të ndryshme për ngjarjen.
Burime nga Prokuroria thanë se Qatja dhe miqtë e saj do të pyetën edhe për kokainën që kanë konsumuar në apartament.
