Dhjetë persona janë arrestuar dhe proceduar për veprat penale “Shpërdorimi i detyrës” dhe “Prerja e paligjshme e pyjeve”, njoftoi këtë të shtunë policia e Korçës. Arrestimet dhe procedimet erdhën në kuadër të aksionit të koduar “Prespa” nga Drejtoria Rajonale e Policisë në bashkëpunim me Prokurorinë e rrethit, pas një hetimi 1 mujor.
Në pranga u vunë 5 punonjës të Agjencisë së Zonave të Mbrojtura në Qarkun Korçë dhe 1 prej tyre ndiqet në gjendje të lirë. U proceduan edhe 4 shtetas të tjerë, të cilët u kapën duke prerë në mënyrë të paligjshme pyjet, në zonën e mbrojtur.
Të arrestuarit: O.D, 38 vjeç, banues në Korçë (me detyrë përgjegjës monitorimi pranë Agjensisë së Zonave të Mbrojtura në Qarkun Korçë); V.M, 58 vjeç, banues në fshatin Gollomboç, Liqenas (me detyrë përgjegjës menaxhimi pranë AZM); E.L, 48 vjeç, banues në Korçë (me detyrë roje pranë AZM); A.V, 43 vjeç, banues në Goricë të Madhe, (me detyrë roje pranë AZM); V.J, 65 vjeç, banues në Goricë të Madhe, (me detyrë roje pranë AZM).
Filloi procedimi penal në gjendje të lirë ndaj shtetasit E.A, 34 vjeç, banues në Korçë, (me detyrë roje pranë AZM).
“Gjashtë shtetasit e lartpërmendur, në bashkëpunim me njëri-tjetrin, dyshohet se kanë shpërdoruar detyrën, duke mos zbatuar procedurat ligjore të kontrollit për zonën e mbrojtur të Parkut Kombëtar të Prespës, ku në ngastrat 51 e 52 të së cilës, kanë lejuar prerjen e paligjshme të pyjeve, duke shkaktuar dëmtime të rënda të kësaj zone. Gjithashtu në lidhje me këtë ngjarje, filloi procedimi penal në gjendje të lirë edhe ndaj 4 shtetasve, M.S; D.B; J.N dhe D.S, të cilët u kapën në flagrancë duke prerë lëndë drusore pa leje, në zonën e mësipërme. Në cilësinë e provës materiale u sekuestruan 50 m sterë dru, 4 mjete, si edhe 5 copë motorsharra”, njoftoi policia.
